El XVI Festival Intercéltico d’Occidente enllena Tapia de sones asturianos, gallegos y bretones

La bandera celta yá lluz en Tapia, símbolu del aniciu del Festival Intercéltico d’Occidente (FIDO). Hasta’l llunes, la población va vivir una cantidá grande d’actividaes, ente les que destaca’l conciertu de Tejedor na 'Noite Asturiana' del domingu.
 
Esta decimosesta edición del festival va contar cola participación de cinco bandes de gaites y grupos d’Asturies, Galicia y Breizh. Asina, dende ayeri y hasta’l llunes, cuando se va baxar la bandera que xune les enseñes d’estes trés naciones celtes, los tapiegos y visitantes pueden disfrutar de la presencia peles cais de la villa de la Banda de Gaitas Concello de Coles (Ourense), del Grupo de Danza Corisco (Vigo), de la Banda de Gaitas Faragulla (A Pontenova, Lugo) y de Deux amis bretons (Breizh), amás de l’asturiana ‘Banda de Gaitas Ciudad de Cangas de Onís’. El Mercáu Celta instaláu nes places de la Constitución y de Campogrande y les munches actividaes programaes per too Tapia faen obligada la asistencia a un FIDO que, pese a la crisis, mantién un nivel peraltu.
 
No que respeuta a les actuaciones musicales nuecherniegues, qu’esti añu dexen el Murallón pa dir al Alto dos Campos, llugar más espaciosu, destaca la celebración de la ‘Noite Asturiana’, el domingu a partir de les 23.30 hores. Ésta va tar protagonizada pol Muñalén Trío, formación compuesta por Pepín de Muñalén, Lisardo Prieto y Alberto Ablanedo, y por Tejedor, banda que vien de trunfar nel Festival Interceltique de Lorient. Completen el programa de conciertos del FIDO El Koku la Manzana, esta nuechen nel porto de Tapia; la Banda Baile Asalto y Bellón & Maceiras, na ‘Noite Galega’ de mañana; y el ‘Espectáculo Señardá’ del sábadu, nel que van participar dellos grupos de danza asturianos.
 
Escuela Internacional de Música Folk y IV Culturlingua
 
Na xornada de güei, al meudía, va dar entamu la Escuela Internacional de Música Folk con un cursu de acordión a cargu de David Varela, d’El Koku la Manzana. Pal direutor del FIDO, Martín F. Cascudo, esta actividá “ye mui importante porque ye una forma de dar a conocer los instrumentos de los grupos qu’actúen peles nueches y que los visitantes puedan conocer la so complexidá”. Mañana van participar na Escuela Samuel Macía, a les 20 hores nel Auditoriu, col bouzouki, y una hora más tarde, Jaime Rebollo cola gaita rabil. Mentes, el sábadu va ser el turnu del baille, con un taller de danza asturiana y gallega a les 13 hores na plaza de la Casa Conceyu. Por último, el domingu va pesllase l’actividá a les 20.30 hores nel Auditoriu con un clase maxistral de violín a cargu de Lisardo Prieto.
 
El FIDO tampoco nun quier escaecese del aspeutu llingüísticu, polo qu’organiza per cuartu añu consecutivu Culturlingua, xornaes que son un foru de presentación y divulgación de creaciones culturales en gallego-asturiano. Tres la proyeición ayeri del documental ‘A Bruxa de Brañavara’ y una charra d’Alberto Álvarez Peña, va continuar l’actividá esta tarde nel Auditoriu cola emisión del curtiumetraxe ‘A fiya del xastre’ y una actuación del grupu Mestura.
 
Otra manera, a les 18 hores d'esta tarde va tener llugar ún de los momentos más esperaos del festival: la Benvida Celta. Esta actividá que tien llugar nel muelle de Tapia representa una llegada simbólica a la villa de les bandes participantes nel FIDO. Los asistentes han de colocase na zona da Guardia o nel porto de Tapia p'asistir a esti espectáculu nel que collaboren los marineros tapiegos.