El XV Seminariu d’Estudios Asturianos de la Fundación Belenos va celebrase esta fin de selmana cola tradición de la bébora como tema

‘La tradición de la bébora n’Asturies: la sidre ya’l vinu’ ye’l tema sobre’l que xira’l XV Seminariu d’Estudios Asturianos de la Fundación Belenos que repite un añu más en La Puela. Amás de les ponencies habituales previstes pa esti sábadu, el domingu van visitase una viña y una bodega en Cangas del Narcea.

La matrícula d’esti añu sufre una rebaxa con respeuto a l’anterior de 5 euros, pasando de 35 a 30, mentes que se caltienen los 60 euros pal rexime d’agospiu con pensión completa na Nueva Allandesa, dende la xinta del sábadu hasta la del domingu, inclusive. L’actividá va principiar a les 10 hores con una presentación del seminariu y l’actuación musical del gaiteru Llorián García Flórez. Darréu, Juan Redondo, presidente de la DOP ‘Vino de la Tierra de Cangas del Narcea’ va facer un ‘Averamientu a la hestoria del vinu de Cangas: d’APROVICAN a la DOP’. Tamién sobre esta bébora procedente de la uva va xirar la siguiente intervención, nesti casu de Carolina Pelaz, direutora del Muséu de Vinu de Cangas, que va falar de ‘La vide ya’l vinu en Cangas del Narcea: patrimoniu material ya inmaterial’.

A les 12.30 hores va llegar el turnu de la sidre cola intervención del etnógrafu de la Fundación Belenos Inaciu Hevia, que va lleer la ponencia ‘La sidre tradicional asturiana: oríxenes, procesos y preseos’, a la que va siguir otra de José María Díaz Díaz, encargáu de los llagares y destilería ‘Casería de San Juan del Obispo» en Tiñana, de nome ‘La orixinalidá ta nel orixen: los aguardientes de sidre’. Tres una posa pa la xinta, David Rivas, profesor titular d’Estructura Económica de la Universidad Autónoma de Madrid y académicu de l’ALLA, va reanudar les charres a les 17 hores con  una conferencia sobre ‘La sidre y los sos rituales na sociedá asturiana’. Por último, Xosé María García, maestru y productor de sidre casero, va protagonizar la ponencia ‘Facer sidra en casa. Una esperiencia práutica: la esbilla de la mazana, el llagar ‘de portiella’, la preba la sidre casero...’. A les 21 hores ta prevista la cena, a la que va siguir el tradicional Filandón nel Café Centro con música del país a partir de les 23.30 hores.

Visites guiaes per Cangas

La mañana del domingu, los participantes van poder conocer de primer mano la cultura del vinu en Cangas y el procesu de producción d’esta bébora. Asina, desplazaránse al conceyu vecín pa facer una visita guiada al Muséu del Vinu de Cangas a les 11 hores. Les paraes próximes son la viña de la bodega 7 Vidas y la bodega Monasterio de Corias, onde va celebrase una preba. La xinta cola que se pon el ramu al seminariu ta prevista pa les 14.30 hores.

Les persones que quieran formalizar la matrícula pa participar nesta actividá han de facer un ingresu de 30 euros na cuenta bancaria de la Fundación Belenos: ES24 2048-0000-26-0340123307. Nel casu de que s’escueya tamién la opción d’agospiu con pensión completa, han de sumar 60 euros a la cantidá inicial. Pa más información sobre’l XV Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o nel corréu electrónicu seminariubelenos@gmail.com.