El XV Festival Intercélticu d’Occidente yá calienta motores

Queda menos d’una selmana pa l’aniciu del XV Festival Intercélticu d’Occidente, que’l xueves va presentase en Tapia. Charres, esposiciones y actuaciones musicales de grupos del Arcu Atlánticu van tener llugar nel conceyu del 16 al 22 d’agostu.
 
Esta cita nueva de festival entamáu pola Banda de Gaitas Occidente, que vive la so decimoquinta edición, torna a llevar a la playa del Murallón, ubicación privilexada del certame, a artistes de primer nivel procedente de dellos países del Arcu Atlánticu. Asina, el xueves ta prevista l’actuación, a partir de les 23.30 hores nel escenariu instaláu na sablera, de Ta Fechu  y Sacava (Santos, Caleya y Varela); d’Ayalga, l’irlandés Peter Browne y los gallegos The Crass, el vienres; y de los andaluces Stolen Notes y los tamién gallegos Faltriqueira, el domingu.
 
Mentes, el sábadu va celebrase la esperada ‘Noite Máxica’ tres un añu de parón. Ésta va consistir nun espectáculu coordináu por Sara López nel que participa’l grupu de teatru Juan Manuel Méndez, responsable d’adaptar el cuentu ‘Xunta de mitos’ del tapiegu Rafael Cascudo, eventu que va completase coles actuaciones de los grupos participantes nel Festival Intercélticu d’Occidente. El mercáu medieval, una esposición sobre recuperación d’instrumentos tradicionales –abiertu hasta'l sábadu na sala d'esposiciones del Institutu Marqués de Casariego n'horariu de 11.30 a 13.30 hores, y de 19 a 20.30 hores –, talleres musicales o l’alborada del mar, que va celebrase’l domingu a les 11.30 hores, son dalgunes de les munches actividaes previstes nestos díes en Tapia.
 
Hai que destacar entes éstes, la celebración de la tercer edición de Culturlingua, que va desarrollase'l martes y miércoles, a partir de les 20 hores, na Casa Cultura de Tapia. Estes xornaes tienen como oxetivu difundir la cultura propia del llugar y d'Asturies y complétense cola instalación d'un stand onde poder mercar llibros, música y materiales en gallego-asturianu y asturianu. Asina, nel primer día van presentase'l llibru 'Memoria das maos' y el poemariu 'Volta de paso', pa depués dar pasu a un conciertu de los serbios Kolugara. Mentes, nel segundu, va celebrase la charra-coloquio 'A Filarmónica nel recordo', sobre la banda de música activa hasta finales de la década de los 40, pa pesllar cola actuación del grupu Airecor.