El XV Concursu de Tonada de Samartín principia’l vienres cola celebración de la gala inaugural

El Teatru Municipal de L’Entregu va acoyer esti vienres la gala inaugural del XV Concursu de Tonada de Samartín. Los campeones de la edición anterior, Marisa Valle Roso y Héctor Braga, van participar na primer actividá del certame.

Estos dos artistes van compartir escenariu con José Manuel Collado y Marifeli Fernández, que van presentar dalgunos cantares de los sos discos nuevos, y cola Coral San Martín. L’entamu de la gala ta previstu pa les 20 hores y la entrada ye de baldre, anque pal restu de sesiones del concursu, que va principiar como tal el 3 de febreru, va ser de 1,5 euros. Asina, tolos vienres, hasta mayu, el Teatru Municipal de L’Entregu va acoyer actuaciones, cola esceición del parón de la Selmana Santa.

L’Asociación Cultural de Toná y Folklore de San Martín del Rey Aurelio, organizadora del eventu, tien confirmada la participación de más de 70 cantantes –unos 50 homes y unes 20 muyeres– de toda Asturies y Cantabria, anque’l númberu pue ser mayor, yá que’l plazu d’inscripción va permanecer abiertu hasta’l llunes. Los gallardonados van repartise un total de 15 premios, en categoría masculina, y 6, na femenina, con cantidaes que van dende los 100 euros a los 900.  

Gema Suárez, conceyala de Cultura, amosó’l sofitu del Conceyu de Samartín del Rei Aurelio al concursu na presentación celebrada la selmana pasada y agradeció a la organización “el bon trabayu fechu edición tres edición, y yá van 15 años, pa sacar alantre un certame qu’axunta nel conceyu a los meyores cantantes de tonada”. “Supón potenciar la cultura asturiana, los nuesos raigaños y señes d’identidad, poneles en valor, y defender la so continuidá nel tiempu», añadió. Por último, la edil confirmó que dende l’Ayuntamientu “vamos siguir apoyando la cultura asturiana, con ésta y otres iniciativas, yá sían homenaxes, esposiciones o conciertos, porque creemos amás qu’inflúin en dinamizar la vida sociocultural del conceyu al atraer públicu y algamar una repercusión favorable na hostelería y el comerciu llocal”.


Na semeya, un momentu del actu de presentación del concursu.