El xuez Lino Rubio va dar esti llunes la sentencia pol primer xuiciu a los sindicalistes Cándido y Morala

El xuez Lino Rubio Mayo va entregar esti llunes 19 la sentencia pol primer xuciu contra los sindicalistes Cándido Carnero y Juan Manuel Martínez Morala, pa los que'l fiscal pidió na vista castigos de cuatro años de presidiu pola acusación d'estrozar una cámara de control del tráficu nel trescursu de les movilizaciones del sector naval de Xixón a últimos del 2004. Según adelantaba ayeri'l diariu "La Voz de Asturias" que tuvo accesu a la sentencia, nesta condénase a los dos sindicalistes a trés años de presidiu y una multa de 5.625 euros pol estrozu de la cámara, más otra multa de seis euros diarios a lo llargo d'un añu. Los sindicalistes declararon a esti mesmu mediu que la sentencia abulába-yos un "linchamientu"

Dempués de la vista, los sindicalistes denunciaren por dar testimoniu en falso a ún de los axentes de policía que testificaren nel xuiciu. Los sindicalistes declararon la so voluntá de "llevar hasta les últimes consecuencies" la denuncia contra l'axente de policía, qu'afirmó nel xuiciu nun conocer a los acusaos y que Cándido y Morala afirmen que sí los conoz personalmente porque tuviere "infiltráu" en dellos movimientos sociales y políticos "siguiéndonos". Cándido y Morala presentaron como prueba semeyes nes que'l policía apaez acompañándolos nun viaxe a Barcelona en protesta contra'l cume del ECOFIN del 2001. Esta foi una de les munches irregularidaes que los dos sindicalistes vieren nel procesu, nel que tamién llamentaren que nun se permitiese visionar nuevamente les imáxenes de les cámares de seguridá apurríes pola acusación, que los testigos entraren y salieren pela mesma puerta de la sala, pudiendo asina comunicase, o que se-yos notificare a ellos mesmos l'encargu de recoyer les sentencies, dalgo que normalmente suelen facer los procuradores.