El xueves entréguense los diplomes de la UABRA

A les 19 hores nel Paraninfu de la Universidá d'Uviéu cola presencia del rector y el conseyeru d'Educación y Cultura.

Los más de cien alumnos y alumnes que participaron na sétima edición de la Universidá Asturiana de Branu (UABRA), que se desendolcó en Cangas del Narcea ente'l 1 y el 12 d'agostu, van recibir los sos diplomes y certificaos nun actu n'asturianu dafechu col que pieslla de manera oficial esta actividá qu'entama l'Academia de la Llingua Asturiana (ALLA). En concreto impartiéronse'l cursu elemental y avanzáu de Llingua Asturiana, y la segunda fase del Curso de Capacitación en Gallego-Asturiano, a lo qu'hai que sumar cuatro d’Afondamientu Cultural y Llingüísticu: 'Capacitación pa la Traducción al Asturianu', 'Internet y Escuela, un enfoque práuticu', 'Xuegos y tradiciones populares asturianes' y 'Ecoloxía y Mediu Ambiente n’Asturies'.

Amás del rector Santiago García Granda y el conseyeru Genaro Alonso, van intervenir nel actu José Víctor Rodríguez, alcalde de Cangas; Cristina Valdés, direutora de la UABRA y direutora xeneral d'Universidaes y Investigación; y Ana María Cano, presidenta de l'ALLA.