El Xueves de Comadres da entamu al Antroxu asturianu modernu

Asturies va vivir dende esta nueche cinco díes de folixa, mázcares y bona gastronomía. Llega l’Antroxu, festividá asturiana que nel pasáu entamaba col solsticiu d’iviernu y qu’agora resúmese a les xornaes previes al Miércoles de Ceniza.
 
La primer cita ye’l Xueves de Comadres, xornada nel que les muyeres axúntense pa comer y pasar una xornada festiva. Anque l’orixe d’esta folixa pue tar fuera del Antroxu tradicional, esta cita tan asturiana considerase l’entamu del Antroxu modernu. Xixón y La Pola Siero son les villes que nos años últimos mantienen con fuercia esta tradición que caltuvieron per munchos años les cigarreres de la fábrica de tabacos de Cimavilla. Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Güei, la folixa treslladóse de la tarde a la nueche y munchos restaurantes ofrecen menús especiales pa esta xornada.
 
Ye de destacar tamién el llabor de la Tertulia Feminista Les Comadres, que celebra’l so 25 aniversariu, pa potenciar esta fecha festiva. Esti grupu de muyeres entama tolos años una espicha na qu’entreguen dos premios: el comadre d’oru y el felpeyu, ésti últimu a persones o entidaes que desprecien a la muyer. La premiada d’esti añu ye l’alcadesa de Xixón, Paz Fernández Felgueroso, mentes que’l felpeyu foi pa Francisco Javier León de la Riva, alcalde de Valladolid del PP, poles sos descalificaciones sobre Leire Pajín con frases como “cuando veo esos morrinos namái pienso nuna cosa”. Mentes, el títulu de babayu esti añu ye pa Salvador Sotres, escritor habitual en medios de comunición, polos sos comentarios machistes.
 
Los antroxos de Xixón y Avilés son los más importantes en cuantes a programa institucional y participación. Música y delles actividaes orientaes más a asemeyase a los carnavales de Río, Tenerife o Cádiz, protagonicen estes xornaes na que la xente participa antroxándose, anque con mázcares lloñes de la tradición. Los vienres ye habitual ver a los neños antroxaos nos colexos y en Xixón les charangues calienten motoroes pal concursu de charangues del sábadu y del domingu, que yá va pola so vixésimocuarta edición, con una participación alta. El sábadu, los focos van p’Avilés, onde se celebra’l Descensu de Galiana a partir de les 18.30 hores. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.
 
El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, n’especial la más mozo.
 
El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza. De la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadillu y los postres típicos, como los frixuelos y les picatostes.
 
En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como ye’l casu de Mieres del Camín y d’Uviéu. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares. Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa.