El Xovellanos cancelará l'actuación d’Albert Pla depués de qu'afirmara que-y da "ascu ser español”

|

El conseyu d’alministración del Teatru Xovellanos cancelará esti vienres la obra ‘Manifestación’ d’Albert Pla prevista pal día 25 tres un pidimientu del PP xixonés. El catalán afirmó nuna entrevista a un diariu asturianu que-y da “ascu ser español”.

El provocador artista de Sabadell respondió al periodista de ‘La Nueva España’en primer llugar a la entruga ‘¿Usted es partidario de la independencia catalana? con un “claro que estoy a favor, ¿quién quiere ser español?”, a la que siguió la cuestión ‘¿No ve que haya otras posibilidades de convivencia al margen de la secesión?’, que Pla resolvió afirmando “no, a mí siempre me ha dado asco ser español, como espero que a todo el mundo. Me gustaría que los catalanes fuéramos independientes y que en Gijón se estudiara el catalán por cojones, igual que nos pasa a nosotros ahora”. Estes declaraciones tuvieron una respuesta rápida por parte del PP, en concreto del conceyal Francisco Rodríguez Cubiella, miembru del conseyu d’alministración del Teatru Xovellanos –formáu por seis representantes de Foro y trés del PP–, que reclamó a Carlos Rubiera, conceyal d’Educación, Cultura, Xuventú y Fiestes, que cancelara l’actuación por entender que’l catalán insulta a los xixoneses con eses pallabres.

Esta decisión, que se confirmará mañana, ye dende ayeri’l tema más tratáu nes redes sociales y ta teniendo ecu a nivel estatal. Güei, l’artista, tres enterase de les intenciones del Teatru Xovellanos, afirmó en declaraciones a la emisora catalana RAC1 que “me da asco ser español, y esta mañana más", pa depués añadir que yá ta avezáu a la censura. L’anulación de l’actuación en Xixón dexa a 400 persones con entrada ensin la posibilidá d’asistir al espectáculu nel que Pla ganaría’l 90 por cientu de les perres recaudaes y abre un alderique sobre la esistencia de llibertá d’espresión nel Estáu. El de Sabadell tien previsto una actuación nueva n’Asturies, el 22 de payares en Piedrasblancas, que’l PP tamién busca cancelar.

 

Contador Estadistiques