El "Xosefa Xovellanos" premia a un históricu de la lliteratura asturiana

La Conseyería de Cultura entregó ayeri los sos premios 2004 de novela y periodismu. El premiu de poesía quedó ermu.

Miguel Solís Santos cola obra Los falapios del xigante ganó'l premiu de novela Xosefa Xovellanos, que ya consiguiere nel añu 84 cola obra El trunfu prietu. L'autor de la primer novela n'asturianu del surdimientu (Les llamuergues doraes, 1982), tuvo acompañáu nel actu que se celebró na sé del Real Institutu d'Estudios Asturianos (RIDEA) polos demás premiaos, ente ellos el galardonáu col premiu de periodismu radiofónicu, Xandru Osuna, responsable del programa "El Xorrecer d'Asturies" en Radio Vetusta y collaborador d'Asturies.com. Ismael González Arias,pela so parte, ganó'l premiu de periodismu escritu por un artículu sobre la Tonada como xéneru musical espublizáu nel diariu "La Nueva España". El premiu de poesía Xuan María Acebal quedó ermu.

Onde nun quedó ermu'l premiu foi en Mieres, onde'l tradicional certame de poesía "Teodoro Cuesta" que llegaba yá a la so XIV edición tuvo de repartir el galardón d'esti añu ente la profesora de lliteratura Marta Mori y l'autor Xosé Ánxelu Gutiérrez Morán, responsables respectivamente de los poemarios "El tiempu de la espera" y "Países".