El xixonés Dani Navarro finó’l Tour nuna meritoria novena posición

|

El ciclista xixonés del Equipe Cofidis, Dani Navarro, convirtióse nel cuartu asturianu n’acabar ente los diez primeros clasificaos del Tour. Christopher Froome (SkyTeam) ganó con superioridá la edición númberu cien de la ronda francesa.

Navarro, que tuvo cerca d’abandonar la carrera na primer selmana tres encandenar delles cayíes, firmó una actuación perbona nel Tour, finando en novena posición, a 15.52 del líder, el británicu nacíu en Kenia y formáu en Sudáfrica, Froome. El del Cofidis llegó octavu a la penúltima etapa, cabera nos Alpes, pero nun pudo caltener el puestu énte la bona actuación d’Alejandro Valverde (Movistar), ciclista al que namái un problema mecánicu y una mala xestión de la situación del so equipu na espectacular decimotercer etapa, con final en Saint-Amand-Montrond, dexólu fuera del podiu.

El xixonés ye’l cuartu ciclista asturianu que termina ente los diez meyores na carrera más importante del mundu. Enantes namái lo consiguieran Vicente López Carril (1971, décimu; 1973, novenu; 1974, terceru; 1975, quintu; 1976, décimu), José Manuel Fuente ‘El Tarangu’ (1973, terceru) y Samuel Sánchez (2008, quintu;  2010, terceru; y 2011, quintu). L’otru asturianu que participó nesti Tour, el mierense Benjamín Noval (Team Saxo-Tinkoff) viose obligáu a abandonar la ronda tres nueve etapes por una lesión nel deu al chocar contra la cámara de fotos d’un aficionáu na crono por equipos.

Froome, imparable

La victoria na edición númberu cien del Tour foi pa Froome, que dominó la carrera de principio a fin. El británicu compartió’l caxón nos Champs-Élysées col ciclista revelación de la ronda gala, el colombianu Nairo Quintana (Movistar), a 4.20 del líder; y el catalán Joaquim ‘Purito’ Rodríguez (Катюша), a 5.04. La cuarta posición foi pal otru gran favoritu, Alberto Contador (Team Saxo-Tinkoff), que nun pudo dar el so nivel habitual y finó a 6.27 de Froome.

El Team Saxo-Tinkoff llevó la clasificación por equipos, mientres que Quintana consiguió la de la montaña y la de ciclistes mozos. El de los puntos foi pa Peter Sagan (Cannondale).

 

Contador Estadistiques