El XIX Mercáu Tradicional La Flor de Ḷḷena enllena La Caleya de música y artesanía

José Manuel Tejedor, La Tarrancha y Luz de Gas protagonicen los conciertos principales.

La Pola yá celebra La Flor, con cuatro xornaes d'actividaes que van finar el llunes cola xuba al preu de La Flor. Güei va tener llugar la primer romería con Cuarta Calle y Trío Fusión nel entoldáu de la plaza Alfonso X, mentes qu'en La Caleya yá ta too preparao pa mañana abrir el XIX Mercáu Tradicional La Flor de Ḷḷena, qu'aumenta'l númberu de puestos, toos centraos n'artesanía.

Va ser a les 10 hores pa recibir poco depués les primeres alboraes de pareya de tambor y gaita, asina como una visita de la Banda Gaites Güestia, organizadora del mercáu. Los actos institucionales y la llectura del pregón, a cargu de Gabino Antuña, tán previstos a les 12.30 hores, y depués va enramase la fonte del barriu.

La primer xornada va completase, ente otres coses, con un vermú col Grupu Folklóricu Blimea (14 hores), títeres y teatru pela tarde, y l'apaición de los Zamarrones de Ḷḷena (19.45 hores). A les 20 hores ta previsto un conciertu de La 402, mentes qu'a les 23 va allargase la folixa coles actuaciones de José Manuel Tejedor, en formatu tríu, y La Tarrancha.

Tarde en Danza

La Bandina'l Pelegrín (10.30 hores), La Flor de Xanzaina (11 hores), Cacía (11.30 hores) y Al Son la Talambera (13 hores) van animar la mañana del domingu hasta l'actuación d'Anabel Santiago, Compañeras y Luis A. Pola a les 14 hores na actividá 'Sones y cantares d'Asturies'. L'actividá vespertina va principiar a les 16.30 hores y, con una Tarde en Danza, dende les 18.30 hores con Banda de Gaites Güestia xunto con collacios, L'Artusu de Figareo y Pandereteros d'Anguaño, como actividá principal.

A les 21 hores van entregase los premios a los meyores puestos artesanos del mercáu, pa pesllar esta edición col conciertu, dende les 22.30 hores, del grupu ḷḷenizu de versiones de rock Luz de Gas. Va ser el puntu final a dos díes d'actividaes que se complementa cola programación del Conceyu, con romeríes tamién con Dominó y Dani y su Acordeón, mañana, y Pasito Show y Taxista Coplero, el domingu.