El XIII Festival de Bandes de Gaites Villa de Xixón principia esti llunes

|

La folixa venceyada al folclor nun para nel branu xixonés. Esti llunes principia'l XIII Festival de Bandes de Gaites Villa de Xixón, que va vivir el so día grande’l vienres col desfile de les cinco agrupaciones participantes y la gala na Plaza Mayor.

Asina, xunto cola Banda de Gaitas Villa de Xixón, organizadora del certame, van participar nesta edición la Banda Gaites Ribeseya, la Banda de Gaitas Ciudad de Cangas de Onís, la Banda Gaites Conceyu de Siero y la Banda Gaites Xácara. El desfile va principiar a les 20 hores, con salida d’El Náutico y final en Campu Valdés, pa depués pasar a la Plaza Mayor onde, a les 21.45 hores, tres la llectura del pregón, va tener llugar la gala del XIII Festival de Bandes de Gaites Villa de Xixón. Sicasí, yá dende les 18 hores va ser posible sentir el soníu de les gaites na ciudá, yá que les bandes participantes van actuar en dellos puntos de la villa: la Banda de Gaitas Infantil La Magüeta de Xixón, n’El Náutico (18 hores); Xácara, na plaza Institutu/El Parchís (18.30 hores); Ciudad de Cangas de Onís, en Campu Valdés (18.30 hores); Conceyu de Siero, na plaza d’Italia (18.30 hores); Ribeseya, na plaza’l Marqués (18.30 hores); y Villa de Xixón, n’El Náutico (19 hores).

A lo llargo la selmana tamién va haber actuaciones de la Banda de Gaitas Villa de Xixón, qu’abre’l festival esta tarde, a partir de les 18 hores, nel Paséu de Begoña. Mañana, esta agrupación va tar a les 18 hores na plaza Institutu/El Parchís, mientres que’l miércoles va facer lo propio a la mesma hora n’El Náutico y, sesenta minutos más tarde, en Campu Valdés. Yá de xueves, la banda xixonesa va intervenir na plaza d’Italia (18 hores) y na plaza’l Marqués (19 hores).

Festival Folclóricu Internacional

Esti llunes tamién va principar el Festival Folclóricu Internacional de Xixón, que nesta ocasión va contar cola presencia de grupos llegaos de Catalunya, Rusia y Benín. El certame divídese en dos xornaes y les formaciones encargaes d’abir el festival esta nueche son el Grupo Folclórico Jovellanos (Xixón), Les AS du Benin (Benín), Folk Dance Ensamble Kuban Kovacs (Kuban, Rusia) –tamién van actuar mañana, a les 13 hores, nel Paséu de Begoña– y l’Agrupación Folclórica Asturiana Los Xustos (Xixón). Mientres, mañana va ser el turnu de l’Asociación de Folclore Azabache (Xixón), Jagar Dance Group (Kalmukia, Rusia), Casal Cultural Danssaires Manresans (Manresa) y el Grupo Folklórico Trebeyu (Xixón). Les actuaciones van dar comienzu a les 22 hores.

 

Contador Estadistiques