El XII Festival Internacional de la Gaita enllena d’actividaes Villaviciosa

Dende esti xueves y hasta’l domingu va desendolcase en Villaviciosa’l XII Festival Internacional de la Gaita (FIG). Son munches les actividaes diaries previstes, siendo’l sábadu la xornada central coles actuaciones de les bandes de gaites n’El Pelambre y la Nueche Folk, a lo que se suma la XX Fiesta de la Sidra.

L’espectáculu de lluz y música ‘La nueche de la gaita’, creáu por Martín Poladura, va abrir mañana’l certame a les 22 hores na plaza Xosé Caveda y Nava, pa siguir depués la folixa nel Pub Trasgu con un conciertu de Bufff Tríu y una sesión abierta. El vienres va comenzar l’actividá nel mercáu tradicional d’El Pelambre a les 17 hores, momentu nel que se va inaugurar oficialmente esti festival qu’entama la Banda Gaites Villaviciosa-El Gaiteru.

Esta segunda xornada va tar dedicada a la danza, cola celebración a les 22 hores n’El Pelambre de la III Nueche en Danza, cola participación de Los Gascones, Pandereteres de Fitoria y Cantaruxare. Enantes, a les 17 hores Balbino Menénez va poner nel Centru Cultural San Xuan de Capistrano un taller d’ornamentación de gaita, y, a les 20 hores nel Teatru Riera, Borja Baragaño va dar un conciertu de gaita irlandesa.

XX Fiesta de la Sidra

Un taller de fabricación de payueles de gaita a cargu del artesanu Raúl García (de 10 a 18 hores nel Atenéu Obreru) y el IV Alcuentru de Luthiers d’Instrumentos Musicales Tradicionales (de 11 a 20.30 hores n’El Pelambre) van abrir el sábadu la xornada, que tien como eventos centrales el XII Festival de Bandes de Gaites del FIG y la Nueche Folk, a lo qu’hai que sumar la XX Fiesta de la Sidra, con un programa propiu. Ésta va dar comienzu’l meudía y va allargase hasta les 15 hores n’El Güevu.

Les bandes de gaites participantes nesta edición del FIG son la Villaviciosa-El Gaitero, asina como la so estaya de Veteranos; La Reina del Truébano; El Trubiecu; Xácara; El Gumial; y la gallega Nova Fronteira. Toes van salir en pasucais a les 17 hores, pa llegar a les 17.45 hores a El Güevu y actuar a les 18 hores n’El Pelambre.

Nesi mesmu llugar va tener llugar la Nueche Folk, que va contar coles actuaciones de Texu, grupu formáu por músicos irlandeses, ingleses y asturianos, Felpeyu y La Tarrancha. El comienzu de los conciertos ta previstu pa les 22.30 hores.

El II Certame de FIG de Canción Asturiana va protagonizar la xornada cabera xunto col VII Concursu de Gaiteros Solistes ‘Memorial José Huerta’. Dambos eventos van celebrase n’El Pelambre, el primeru a les 17 hores con les interpretaciones de Carlos Velasco Montes, Daniel Velasco Peláez, Alicia Villanueva, Isaac Sierra, Rosario González y Arturo Alonso (gaita), y el segundu, a les 19 hores. Mentes, pela mañana, de 12 a 15 hores, van entamase actuaciones nos chigres de Villaviciosa.

Gastronomía y autocares a Xixón, La Pola y Uviéu

Nel FIG tamién va haber güecu pa la gastronomía, con les nomaes ‘tables gaiteres’. Éstes tán formaes por ente 3 o 4 tapes, según el chigre, y tien un preciu de 10 euros, de 12 si se quier acompañar por una botella de sidra.

Otra manera, el vienres y el sábadu va haber autocares nocherniegos que va coneutar Villaviciosa con Xixón y con La Pola Siero y Uviéu. La frecuencia va ser cada dos hores.