El xestor de cuentes de Twitter, Splitweet, incorpora l'asturianu

Iniciativa pol Asturianu ta acabante d’anunciar l’alcuerdu col que llegó con Splitweet pa qu’incorpore la llingua asturiana al so serviciu. Splitweet ye un xestor de cuentes de Twitter afayadizu pa usuarios con dellos perfiles na rede social.
 
Esta ferramienta ufre los sos servicios básicos en 28 idiomes, ente los que tamién tán el restu de llingües peninsulares, a esceición del aranés. Sicasí, el trabayu fechu por Iniciativa pol Asturianu permite que la nuesa llingua sía una de les siete nes que se puede tener accesu a tolos servicios de Splitweet. Les restantes son l’inglés, el castellanu, el catalán, el danés, l’hindi y el suecu.
 
Dende Iniciativa pol Asturianu tán trabayando tamién porque Twitter incorpore al asturianu al catálogu d’idiomes qu’ufre a los sos usuarios, dalgo que dende’l coleutivu consideren mui importante pala normalización del idioma dada la repercusión tan grande que tien esta rede social. Twitter ta nestos momentos entamando un procesu pa presentar plataformes en catalán y gallegu.