El xéneru de terror protagoniza les XI Xornaes de Lliteratura Infantil y Xuvenil de Samartín del Rei Aurelio

Proyeiciones de cine, teatru, llibros, esposiciones y charres conformen el programa de les XI Xornaes de Lliteratura Infantil y Xuvenil de Samartín del Rei Aurelio. El xéneru de terror ye la temática sobre la que va xirar esta edición.

L’actividá d’esta iniciativa entamada pola conceyalía de Cultura, Educación, Deporte y Igualdá principió ayeri cola inauguración de la esposición de dibuxos del llibru ‘Mieu’ del escritor Milio’l del Nido y l’ilustrador Alberto Sastre, abierta’l públicu mentes tol mes de payares na Casona del Bravial, en Blimea, n’horariu de 9 a 14 hores de llunes a vienres. Amás, los díes 13, 22 y 29 tamién va poder visitase de 18 a 20 hores. Otra manera, esta mañana Carlos Alba ‘Cellero’ protagonizó la obra teatral ‘Un cuento, un arrullo, una canción’ pa los neños y neñes de les escueles de 0 a 3 años de Sotrondio y L’Entregu.

Les xornaes van continuar la selmana próxima cola representación el martes de ‘Tristán y Pauletta’ por Alevosía Teatro nel Teatru Municipal de L’Entregu (11.30 hores) y la proyeición de la versión asturiana de ‘La nueche de los muertos vivientes’, doblada por Gonzali Producciones, na Casona del Bravial a les 19 hores. Mentes, el xueves, el teatru entreguín va acoyer una obra de títeres entitulada ‘Malas palabras’ (11.30 hores), de Tras la Puerta. El teatru va siguir el miércoles día 21, a la mesma hora, con ‘Semillas de Cardadomo’ d’El Callejón del Gato.

Tamién el miércoles 21, nesti casu en Blimea, l’escritor Chechu García va dar una charra baxo’l nome ‘Terror n’asturianu’ (19 hores), na que va repasar tolo que se fixo en llingua asturiana nesi xéneru, tanto nel ámbitu lliterariu como nel mundu del cómic, la radio, la televisión o’l cine. La presentación del llibru ‘Mieu’, el miércoles 28 a les 19 hores, tamién na Casona del Bravial, va zarrar les actividaes de les XI Xornaes de Lliteratura Infantil y Xuvenil de Samartín del Rei Aurelio.

Pa impulsar vezos de llectura

Según destaquen dende la conceyalía de Cultura, l’oxetivu d’estes xornaes “pasa por impulsar vezos de llectura y creativos ente’l públicu infantil y xuvenil mediante’l so averamientu al mundu de les lletres, les artes escéniques o’l cine dende una perspeutiva recreativa y, al mesmu tiempu, educativa”. Amás los asistentes van poder conocer les novedaes en lliteratura infantil y xuvenil, tanto n’asturianu como en castellanu.