El web de Xixón cambia pa peor

El Ayuntamientu de Xixón presenta esta mañana con tol bombu posible la nueva páxina web oficial del conceyu, un remocique que yá tardaben en facer y que bona falta facía, pero lo cierto ye que'l web nuevu del conceyu con más población d'Asturies presenta poques novedaes quitando lo tacante al diseñu. Los conteníos de la páxina son más o menos los mesmos que tenía enantes, solo que presentaos con un diseñu más amañosu, anque otra cosa ye'l funcionamientu, con scripts que nun dexen abrir la metá de les coses en ventana nueva. Otramiente, mientres la versión antigua de la páxina tenía polo menos una presentación curtia n'asturianu de la ciudá, na versión nueva esti testu desapaez, colo que tolos conteníos del web tan dafechu namás en castellanu. Inda más, el web trai un buscador internu qu'apurre resultaos de lo más interesante. Si se consulta pola palabra "Xixón" saldrannos cinco entraes, rellacionaes con publicaciones del conceyu, mientres que si entrugamos por "Felgueroso" -l'apellíu de l'alcaldesa- el buscador devuélvenos venti entraes... Por cierto, el web nun ye accesible con Netscape 4.