El volume VI del 'Atlas Sonoru de la Llingua Asturiana' ve la lluz

Ta dedicáu al gallego-asturiano y incorpora 32 documentos nuevos al trabayu.

Les grabaciones fixéronles Jesús Suárez López y Xosé Miguel Suárez Fernández 'Tapia' ente los años 1996 y 2012, y recueyen testimonios orales diferentes: lleendes, cuentos populares, cantares, ensalmos, conxuros y otros rellatos narraos por falantes naturales d'Ibias, Ayande, Grandas de Salime, Santalla d’Ozcos, Samartín d’Ozcos, Pezós, Eilao, Bual, Taramunde, San Tiso d’Abres, A Veiga, Castripol, Tapia, El Franco y Navia.

Estos 32 documentos sonoros grabaos en calidá dixital constitúin "una amuesa 'viviente' de les modalidaes llingüístiques diferentes del gallego-asturiano, al empar que se convierten nuna manifestación tanxible del Patrimoniu Cultural Inmaterial d'Asturies.

Siguiendo'l mesmu esquema que los cinco volumes anteriores, caún de les grabaciones vien acompañada con una trescripción testual pa que la voz falada complemente a la pallabra escrita. Asina consíguese dar vida a ésta, yá que "cada voz posee una cadencia, una entonación y una sonoridá úniques y irrepetibles".

Según espliquen los autores del volume, los falantes que participen nel mesmu tienen "una conciencia de tar nun territoriu de transición onde s'amiesten traces del gallegu y del asturianu, lo que da pie a la sensación xeneralizada de nun ser falantes de gallegu nin d'asturianu —idea ésta que se repite en munchos testimonios— y que da llugar a denominaciones diverses como 'chapurrao', 'chapurro', 'chapuzo' o 'achaponao'". Hai que recordar que'l término académicu de 'gallego-asturiano' acuñólu Dámaso Alonso nos años 40 del sieglu XX nos sos primeros artículos sobre la fala de la zona y que ye la denominación que l'Alministración asturiana usa na so llexislación y la que s'emplega tabién na so normativa ortográfica.

El sur del país, completu

Col volume númberu VI del Atlas Sonoru de la Llingua Asturiana, qu'edita'l Museú del Pueblu d'Asturies y la Rede de Museos Etnográficos d'Asturies, complétase tol sur d'Asturies, rexistrando grabaciones sonores dende Ibias y Degaña hasta Cabrales y Peñamellera. Los cinco primeros foron, nesti orde, los siguientes: Suroccidente d'Asturies, Centru-occidente d'Asturies, La Montaña Central d'Asturies, El Valle'l Nalón y El cordal oriental d'Asturies.

Na estaya 'Archivu Sonoru' de la nuesa revista 'Espaciu y Tiempu de la Llingua Asturiana' pue atopar tola información sobre esta iniciativa y otres entamaes n'Asturies al rodiu del nuesu patrimoniu oral. Mentes, na web de la Rede de Museos Etnográficos d'Asturies tien disponible tol trabayu desendolcáu nos seis volumes del Atlas Sonoru de la Llingua Asturiana.