'El Vocabulariu de Santa Bárbola' cuenta con 7.500 entraes y podría ampliase

Xulio Llaneces nun descarta una segunda edición d'esti pallabreru.

El maestru y llicenciáu en Filosofía y Lletres y Doctor en Filoloxía Hispánica, amás de miembru de l'Academia de la Llingua Asturiana, presentó'l 'Vocabulariu de Santa Bárbola' esti sábadu nel stand de Radio San Martín na Feria de Muestres y Esposiciones de Samartín del Rei Aurelio (FEMEX) dientro de la emisión en direutu del programa 'Al llau del llar'. Llaneza esplicó como surdió facer el llibru, editáu por B.Alto, el so procesu d’ellaboración y tol trabayu previu par ecoyer la información acerca del mou de falar de la xente d'esta parroquia de Samartín del Rei Aurelio, con una escoyeta amplia qu’abarca pallabres de toles estayes de la vida diaria, incluyendo más de 7500 entraes, que tal y como dixo, tovía nun escosen la gran bayura de la fala local, polo que'l de Perabeles nun descarta la so ampliación nuna edición próxima.

Mientres la presentación tamién fixo referencia a la metafonía vocálico que se da nesta zona y faló sobre l'usu del idioma na sociedá y el so futuru. Llaneza ye'l responsable de la recoyida de tola toponimia oral de les cinco parroquies de Samartín del Rei Aurelio, amás de la de la parroquia cabraliega de Berodia y les llavianeses de Carrio y Tolivia, trabayu que la Xunta de Toponimia tomó como base a la hora d'oficializar los topónimos tradicionales d'estos conceyos.