El VIII Premiu al Meyor Cantar cuenta con namái cuatro finalistes

Per primer vegada dende la so creación nel añu 2007, el Premiu al Meyor Cantar va contar con namái cuatro finalistes –la cifra habitual yera de cinco–. Éstos son Rafa Lorenzo, Vrienden, el Grupo de Gaitas El Trasno y Silvia Quesada.

Estos cuatro artistes y formaciones aspiren a llevar el gallardón que premia al meyor tema en llingua asturiana y gallego-asturiano comercializáu mientres el 2013, quedando escluyíes les pieces tradicionales yá esistentes, les versiones o adaptaciones d'obres de creación publicaes orixinalmente n'otra llingua y los cantares que nun foren editaos y grabaos per primer vez nesos doce meses. Les canciones coles que van competir na gala prevista pal 14 de marzu, a les 19.30 hores, nel Teatru de la Llaboral son ‘Ente mazanos’ (Rafa Lorenzo), ‘Vivu en dalgún llugar’ (Vrienden, con lletra de Xurde Fernández), ‘Volviche’ (Grupo de Gaitas El Trasno, de Cuaña, con lletra de Xosé Miguel Suárez Fernández ‘Tapia’ y voz del cantante del grupu xixonés Maurizios, Kike Dembinsky) y ‘La pena abierta’ (Silvia Quesada, con lletra d’Alfredo González).

Polo tanto, el públicu va atopar temes de calter festivu, folk y pop. Toos son debutantes na final d’esti concursu, anque’l compositor Alfredo González yá ganara na edición del 2009 como cantante col cantar ‘La nada y tu’ d’Antón García y fora finalista nel 2012 con ‘Felina bipolar’. Completen el cartelu de la gala los vencedores del añu pasáu, Taranus con ‘Ensin ti’, que van actuar mientres l’alderique del xuráu sobre qué tema merez el gallardón.

El ganador del VIII Premiu al Meyor Cantar va llevar una escultura orixinal y esclusiva d’una o ún artista asturianu de prestixu reconocíu, va recibir promoción dende’l Gobiernu al traviés de los medios de comunicación y va participar n’eventos entamaos pola Alministración. Nesta ocasión, l’artista y grupu responsable del meyor tema del 2013 nun va poder defendelu nel Liet International, festival européu de canciones en llingües minorizaes que paez que nun va celebrase tampoco esti añu tres suspendese nel 2013 por decisión unillateral de la Cullittività Tarrituriale di Corsica cuando yá taben confirmaos el representante frisón, lapón y asturianu, que diba a ser Taranus.