El VIII Outono en Bual enllena d’actividaes la villa

Conciertos, conferencies, talleres, gastronomía y esposiciones conformen les actividaes d’estes xornaes culturales qu’entama l'Asociación Xuvenil Mezá esta fin de selmana. El sábadu van actuar N’Arba, La Tarrancha y los gallegos Chotokoeu.

Esti “mini-festival autoxestionao” nació nel 2008 pa “motivar y dar un pouco de vida al occidente asturiano y, sobre todo, espertar as mentes d'aquellos que pasan el día delantre da televisión y da cultura institucional”. Un oxetivu que l’Asociación Xuvenil Mezá vien cumpliendo añu tres añu, como amuesa’l crecimientu progresivu d’un certame que yá ye un referente na zona.

D’igual forma, l’Outono en Bual quier ser “un acto de reivindicación das dúas llinguas tradicionales d'Asturias, el asturiano y el gallego-asturiano”, polo que la organización fai “tresversal el uso d’ellas nas xornadas” y pon en valor la cultura del país y la so evolución nel sieglu XXI, “llonxe d’esteriotipos y de clichés impostos por ningún dogma oficial”. Toles actividaes, amás, son de baldre, y la organización acuta un espaciu d’acampada cubierta pa facilitar la participación nes xornaes de persones procedentes de fuera de Bual y, inclusive, d’Asturies.

Les actividaes van principiar esta tarde, a les 20 hores, n’Helenias, llocal de Frieira, cola presentación de les xornaes y un magosto. Ésti va consistir, nun primer momentu, na representación teatral costumista de la obra ‘É así a vida’, a cargu del Grupo de Teatro Pico de Faro da Roda (Tapia), y, darréu, na actuación del el grupu de gaites Os Pampirolos de Grandas.

Galicia y Asturies nel I Trofeo Villa de Bual de Biyarda

La mañana del sábadu va principiar con ún de les novedaes d’esta edición, l’entamu del I Trofeo Villa de Bual de Biyarda, nel que van enfrentase la seleiciones de Galicia y Asturies. La competición d’esti deporte tradicional conocíu como liriu nel restu del país va dar comienzu a les 11.30 hores nel polideportivu llocal. Los xuegos tradicionales van continuar de tarde, magar les 16 hores, con un taller impartíu por Carlos Suari y Alejandro López.  

A les 17.30 hores Llorián García va presentar na Casa da Cultura la esposición fotográfica ‘Re-condiciones’, “úa reflexón da música tradicional asturiana dende el punto de vista das investigación d’este musicólogo”, espliquen dende l’Asociación Xuvenil Mezá. Darréu, a les 18 hores, Arturo Iglesias y Jesús García Albá van dar la charra-taller ‘A torneiría nel occidente d’Asturias’, “un repaso teórico y práctico sobre a torneiría, úa forma propia d’entender el trabayo en madera”.

Como yá ye vezu nel Outono Cultural, va celebrase “un comedor popular nel que se van poder degustar productos del país y da terra ben cociaos”. El so aniciu ta previstu a les 20.45 y la organización ufre un menú omnívoru y otru vexetarianu. Pa poder disfrutar d’esta iniciativa tan prestosa ye necesario mercar los vales previamente, con un preciu simbólicu.

Conciertu de N’Arba

Col banduyu bien enllenu, a les 23 hores llega’l momentu del baille y la folixa nel Helenias. Los primeros en caldiar l’ambiente va ser N’Arba, histórica banda folk con Xosé Antón Fernández ‘Ambás’ al frente. Darréu’l turnu va ser pa los gallegos Chotokoeu, formación fusión que vien de trunfar per toda Europa, pa depués continuar con La Tarrancha, que llega con discu baxo’l brazu: ‘Elefantes na cacía’. El pinchadiscos Señor Sonidero encargaráse por último d’allargar la fiesta hasta bien entrada la madrugada.

L’actividá que va servir pa poner el ramu al VIII Outono en Bual va ser un homenaxe a los músicos tradicionales del conceyu que se va desendolcar a partir de les 12.30 hores del domingu na Praza da Iglesia. Nella van tar presentes “dellos instrumentistas y cantadores da música del país que fixeron tanto polas tradicióis culturales del occidente asturiano y que necesitaban ser reconocidos públicamente”. Éstos desataparán una placa conmemorativa nel llugar.

Otra manera, la organización tien previsto como novedá pa esta edición la rifa d’una cesta de productos del país con comida y artesanía d’Embutidos Pico de Fiel, Queixeiría d’Abredo, Queisos Ca Sanchu, Cosmética Terraveya, Cerveza Caleya, Güerta El Nocéu y Artesanía Verdenaz, amás de discos y llibros en gallego-asturiano, güevos de Pitasana, botelles de La Boalesa y productos de Casa Severón de Navia, ente otros. Les participaciones yá tan a la venta nos chigres de la villa y la cesta va sortiase’l propiu domingu.