El VIII Cume astur-gallegu va tratar la reforma de los estatutos d’autonomía y la financiación autonómica

El VIII Cume ente los gobiernos d'Asturies y Galicia va entamar esta tarde n'Uviéu, onde'l Presidente asturianu Álvarez Areces va recibir a les 16:45 al so equivalente gallegu Emilio Pérez Touriño. Ente los asuntos a tratar n'axenda van tar la reforma de los estatutos d'autonomía de dambes comunidaes y la reforma de la financiación autonómica, asuntu nel que lo mesmo Asturies que Galicia piden que s'atienda al fenómenu d'espardimientu de la población.

El cume, que va desarrollase a lo llargo de la tarde del vienres y la mañana del sábadu, va estremase en meses sectoriales de manera asemeyada al'anterior edición. Modernización y Meyora de l'Alministración; Infraestructures y Territoriu; Mediuambiente y Desarrollu Sostenible; Cultura y Turismu; Educación y I+d+i; Desarrollu Rural y Pesca y Bienestar Social van ser estes meses. Les conclusiones van conocese'l sábadu a les 12 del mediudía, anque l'axenda incluye tamién la firma del Protocolu de cooperación institucional ente Asturies y Galicia pa la declaración y xestión de la Reserva de la Biosfera del Ríu Eo, Os Ozcos y Terras de Burón.