El VIII Certame de Poesía Nené Losada Rico, pa Pablo Rodríguez Medina y Ricardo Candás

Pablo Rodríguez Medina y Ricardo Candás foron los ganadores, ex aequo, del VIII Certame de Poesía Nené Losada Rico. El xuráu escoyó por unanimidá los sos trabayos ‘Mitoloxíes íntimes’ y ‘Naufraxos’ como los meyores.
 
Ésti tuvo conformáu por Antón García, José Luis Rendueles y Xuan Santori. “Les obres ganadores son intenses y estremaes. Entrambos autores apurren una visión densa y personal del fondu sentimental comúnmente compartíu. Los dos poemarios utilicen una carga metafórica destilada, partiendo dende posiciones poétiques mui distintes, pa lo que remanen un material lliterariu firme que fuxe de la fraxilidá cotidiana”, resalta l’acta del xuráu, que tuvo qu’escoyer ente ocho obres procedentes d’Arnáu (Castrillón), Avilés, Ciudad Real, L’Entregu, Xixón, Uviéu, La Pola Siero y Quart de Poblet (València).
 
La entrega de premios d’esti certame convocáu pola Asociación de Mujeres Valdés Siglo XXI va tener llugar el vienres, a las 19.30 hores, na Sala Álvaro Delgado de Ḷḷuarca. De forma paralela, va celebrase’l II Homenaxe Recordando a Nené, nel que van participar los colexos José García, Mus, Padre Galo, Ramón Muñoz, San Miguel (Trevías) y el CRA Álvaro Delgado. El certame tien una dotación económica de 1.200 euros y ta patrocináu por Caxastur y la Conseyería de Cultura y Deporte.