El VII Festival de Cine Asturianu celebra esti llunes la so gala nel Atenéu de Madrid

Un homenaxe al guionista Carlos Blanco Hernández y la entrega de premios van protagonizar la gala del VII Festival de Cine Asturianu, qu’esti añu viaxa a Madrid. L’actu va principiar a les 20 hores nel Atenéu de la capital castellana.
 
Blanco va recibir el Premiu d’Honor del Cine Asturianu pol so llabor nel mundu del cine como guionista. Esti xixonés, que tuvo presu tres la Guerra Civil por defender al bandu republicanu, estrenóse nel mundu del cine col guión de ‘Cuando llegue la noche’, película rodada nel añu 1946 basada na obra de teatru homónima de Joaquín Calvo Sotelo. Tres ella, llegaron otres cintes como ‘La princesa de los Ursinos’ (1947); ‘Las aguas bajan negras’ (1948), de temática asturiana; y ‘Los peces colorados’ (1955), ente otros munchos trabayos que, inclusive, abrieron-y la puerta de la industria norteamericana.
 
Con permisu del homenaxe a Blanco, la entrega de premios del Festival va centralizar gran parte del actu. Nesta ocasión, tán nominaos na categoría de meyor curtiumetraxe les cintes ‘Vidas’, de Nacho Fernández y Pablo Bermejo; ‘Idealizando’, de Moisés Tuñón; ‘Duets el precio de la fama’, de Tito Montero; ‘Puntu’, d'Eva Gallego; ‘Cruces’, de Moisés Tuñón; ‘Tacones’, de Benjamín Villaverde; ‘Anorexia’, de Kiko y Javier Prada; ‘El detective imaginario’, de Juan José Bors y ‘Días Perdidos’, de Senén Fernández. Mentes, David Ballesteros (‘Idealizando’), David Rionda (‘Duets el precio de la fama’); Javier Longas y Jesús Pardo (‘Días perdidos’) aspiren al galardón de meyor actor, y Lara Fernández-Noriega (‘Cruces’); Almudena Gallego(‘Anorexia’) y Susana Carnero (‘El detective imaginario’), al de meyor actriz.
 
Amás, nel trescursu de la gala van emitise los curtiometraxes ganadores y va presentase en Madrid la obra ‘Historia del cine asturianu’, de Xaviel Vilareyo y Villamil. Yá confirmaron la so presencia na gala los direutores Rai García y Rocío García Campelo, l’actriz Mary Paz Pondal y el productor Xuan Gona.