El videu musical 'La Lienda' de D'Urria ye un ésitu en redes sociales

|
'La Lienda' de D'Urria

En menos d'una selmana esti curtiu yá raspia les 30.000 reproducciones en Facebook.

Estrenáu'l pasáu llunes nel marcu del Sol Celta, festival avilesín onde tamién tocó esti grupu asturlleonés de 'folk tsacianiegu', 'La Lienda' ye un curtiumetraxe musical fechu por Héctor Menéndez Aneiros del cantar 'La Lienda' del primer discu de D'Urria 'En Ca Pla' (Goxe Producciones). Nel videu, ambientáu na Guerra Civil, cuéntase la historia de trés combatientes na so vuelta a Villablinu dende Castilla.

Les 30.000 reproducciones y un algame de más 60.000 persones en tan pocos díes amuesen que l'emplegu del idioma nun ye un obstáculu pal espardimientu d'esti tipu de creaciones nin pa la música llariega. Nesti mes de xunetu hai trés oportunidaes pa sentir en direuto esti cantar y los otros del álbum de debú de la banda liderada por José Manuel Sabugo (Tsuniegu) y Moisés Suárez (Felpeyu): el 14 en Santa Marina de Valdeón, el 21 en Candás y el 29 en Xixón dientro del Festival Arcu Atlánticu, nesti casu en formatu sestetu.

Contador Estadistiques