El videu del cantar ‘Entaína’ suma 10.000 reproducciones n'Asturies.com en menos de 48 hores

El recibimientu del cantar ‘Entaína’, de Skama la Rede, ta siendo estraordinariu. En menos de 48 hores el tema que promociona’l Día de la Reciella y la carrera familiar pol asturianu del domingu yá suma más de 10.000 reproducciones na páxina de Facebook d’Asturies.com. “Tamos desbordaos con estes cifres”, asegura’l cantante Miguel Fernandi ‘Burilo’.

Escueles de tol país tán proyeutando’l videu nes sos clases y inclusive pue vese nes pantalles de los autobuses municipales de Xixón. El videu de ‘Entaína’, realizáu por Pablo Quiroga d’Algamar Producciones, ta llegando a miles de persones en tol país, que queden cola lletra prestosa compuesta por David Guardado, miembru de ‘Reciella. Families pol Asturianu'.

“Tamos desbordaos con estes cifres. Tamos flipándolo”, afirma Burilo, qu’apunta que dalgunos de los cantares de la banda en YouTube llleguen a les 25.000 reproducciones pero nun periodu más llargu de tiempu. “Amás, prestónos muncho facer la canción. Miembros de la banda sonlo tamién de Reciella y la grabación del videu colos guaḥes, que se portaron perbién, tamién foi mui prestosa”.

La prueba en direuto col cantar resultó igualmente satisfactoria. “Tocámosla’l vienres en Santurtzi y a la xente gustó-yos, polo que tamos pensando incluyila ente los temes qu’interpretaremos nos conciertos próximos”, apunta’l vocalista de Skama la Rede. De momentu, ta confirmáu ún en Morea’l día 8 y l’actuación nel XIII Asturies Nun Escaez de Sama qu’entama Darréu’l día 15.

Debú en ‘Bestiariu’

‘Entaína’ nun ye’l primer cantar infantil de Skama la Rede, que fixera una versión de ‘El coche’l maestru’ de Xentiquina pal discu homenaxe ‘Xentiquina Crew!’ (Algamar Producciones), y tampoco nun va ser el caberu. La banda ta trabayando nun cantar “qu’espero que nos quede igual de prestosu” pal segundu discu de ‘Bestiariu’, que va tar dedicáu “al cámbaru”, anuncia Burilo.