El videu “Na Caleya” del grupu “La bandina” sigue valtando marques

Más de 1300 reproducciones en 48 hores dientro d'Asturies.com TV ye la marca de la popularidá que ta algamando'l trabayu videugráficu de Javier Lueje y Juan Tizón sobre'l tema "Na caleya" del grupu "La bandina" enxertu nel so discu "De Romandela". El tema ye l'adaptación d'una música tradicional bretona a una lletra creada polos miembros del grupu na qu'un paisanu
va perdiendo'l fatu tradicional prenda por prenda. El videu aprovecha toles posibilidaes folixeres del tema, llevando a una dimensión nueva, y nun esplotada hasta agora por otros grupos nos sos videos promocionales, la capacidá d'un productu fechu en llingua asturiana como conceptu d'entretenimientu.


Los datos que yá ye'l videu más vistu na so estrena dientro del serviciu de TV d'Asturies.com tamién han vese nun contestu en que la popularidá d'Asturies.com TV nun para d'espoxigar. Solo nel día d'ayeri'l públicu demandó más de 1500 reproducciones nun plazu de 24 hores d'ente los más de 25 vídeos distintos qu'igüen hasta agora l'estoyu d'Asturies.com TV. En total, Asturies.com TV sirvió ayeri más de 50 hores de videu en tiempu real, una nueva marca pa esti serviciu.