El viaxe de Xune Elipe pela historia de la música asturiana llega a les llibreríes

‘Hai una llinia trazada’, XXVI Premiu Máximo Fuertes Acevedo d’ensayu, correspondiente al 2020, entama a distribuyise peles llibreríes del país. L’esperáu testu nel que Xune Elipe percuerre con un enclín pedagóxico-divulgativu la historia de la música asturiana dende los sos anicios hasta la nuesa dómina va tar por fin a disposición de los llectores.

“Con él quixi facer la historia de la nuestra música qu'a min me prestaría lleer”, espresa’l cantante de Dixebra, qu’esplica que “nun ta plantegáu como un trabayu académicu o musicolóxicu, sinón como un testu de calter pegagóxicu y divulgativu que llegue al gran públicu y qu'al traviés d'él s'interese por afondar na música del país y disfrutar d'ella”. Trabe encárgase de la edición d’una obra divida en 25 capítulos nel que l’autor fai un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música.

Como nun podía ser d’otra manera, Elipe ellabora esti percorríu d’una manera non colonial al ser la música asturiana un ente autónomu non supeditáu nin dependiente d’otros procesos. “Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente”, apunta l’autor.

El de Villalegre trata tamién el contestu nel que se desenvolvió la música del país, rellacionándola con otros aspeutos como la política, l'arte, la lliteratura o la sociedá. “Ufiértase una panorámica global y amplia del fechu musical asturianu, convirtiéndose nuna ferramienta afechisca pa comprender y analizar qué representó y representa la nuestra música y sobre qué base se sofita’l so futuru”, rellata.