El VI Primer Sidre l’Añu torna en Selmana Santa cola intención de “recuperar el caráuter familiar de les espiches asturianes”

“Consideramos que la cultura asturiana de la sidra va más allá del alcohol”, afirmó Laura Uría na presentación de la VI Primer Sidre l’Añu, que va celebrase nel tendayu del Muséu del Pueblu d’Asturies del 2 al 5 d’abril. “La mayor espicha del país” va tratar de recuperar “el caráuter familiar” d’estes celebraciones y superar los 5.000 visitantes d'ediciones anteriores.

La representante de la Fundación Asturies XXI y la revista La Sidra, entidaes qu’entamen esta folixa dedicada a la sidra fecho sobre la madre, ensin trasegar, anunció la participación de la mayor parte de los llagares asturianos, “alredor de 80”, y la presencia “de dalgunes sidres d’otres zones d’España y de partes d’Europa, concretamente de la Bretaña francesa”. “Esti certame supón l’arranque de la temporada sidrera cola mayor espicha del país” nun intentu de recuperar estes celebraciones tradicionales que tienen llugar nel país por estes feches y, al empar, “recuperar el caráuter familiar” de les mesmes. Por esti motivu, va haber a disposición de los visitantes sidre dulce y sidre ensin alcohol, asina como una cantidá grande d’actividaes  y animación pa neños. “Consideramos que la cultura asturiana de la sidra va más allá del alcohol. Trátase d’una forma de confraternización y de socialización, y tol mundu, ensin distinción d’edá o condición física, pue disfrutar y participar nesti eventu”, apuntó Uría.

Tolos eventos van celebrase alredor del tendayu, onde van instalase los puestos de comida y la barra pa poder prebar la sidra de los diferentes llagares pol preciu de 5 euros. L’horariu del Primer Sidre l’Añu va ser de 10 a 22 hores, anque la espicha abierta va zarrase a les 21 hores. Según avanzó la organización, esti añu amás de tradicional tornéu de cuatriada va celebrase una exhibición de batiente, y ente les actividaes previstes tán les prebes guiaes; maridaxes de sidra con quesos; cocina en direuto; clases maxistrales d’escanciáu a cargu del campeón actual d’Asturies d’echadores de sidra, l’africanu Salvador Ondo; exhibiciones de corcháu y tonelería; música y baille tradicional; el IV Concursu de Sidre Casero Fecho en Maera; y esposiciones, amás de visites guiaes al Muséu del Pueblu d’Asturies y la posibilidá de conocer les aves de la Güelga de la mano del Colectivo Ornitológico Carbayera del Tragamón, ente otres posibilidaes.

Na so intervención, Uría tamién quixo agradecer al Conceyu de Xixón el pasu dau, a pidimientu de la Fundación Asturies XXI, de declarar a la sidra bébora institucional del conceyu. “Tanto los llagareros como los hosteleros y toles persones participantes nel sector sidreru mostráronse encantaos col que’l Plenu lo aprobara por unanimidá. Por ello la Fundación Asturies XXI y la revista La Sidra punxeron en marcha una carta d’agradecimientu a lo que yá se sumaron práuticamente tolos llagareros, asina como numberosos representantes del sector sidreru”, destacó.

Cabueñes, sidra oficial

Nel actu de presentación tamién tuvo presente Diego Agüera, propietariu de Sidra Cabueñes, la oficial del VI Primer Sidre l’Añu tres resultar ganadora del II Concursu a la Meyor Primer Sidre l'Añu nel que tomaron parte 40 llagares d’Asturies y Cantabria. “Ye mui importante esti acontencimientu porque se valora la sidra dende los comienzos, dende cuando se fai un tónel, y tamién la cultura asturiana”, señaló’l llagareru, que reclamó una presencia mayor nes esposiciones “de fotografíes o entrevistes a xente del campu, porque si ellos nun llimpiaren los praos, plantaren les pumaraes, nos vendieren mazana…, esto nun sería posible”.

A última hora sumóse a la mesa José Argüelles, de Tonelería Argüelles, qu’apuntó que “entendemos y creemos qu’esti tipu d’eventos que se faen son mui importantes y la xente debería d’acudir en masa non sólo pola carga de conocimientu que se pue alquirir, sinón tamién por saborgar y disfrutar lo que ye Asturies en realidá. Asturies vive cola sidra y pa la sidra”. Mentes, en representación del Conceyu de Xixón, tuvo presente Jesús Martínez Salvador, xerente de Divertia, que destacó que “la Primer Sidre l’Añu ye un eventu mui importante pa la ciudá de Xixón” tanto pola respuesta de los propios ciudadanos como pa la llegada de turistes, y confirmó que la sidra diba ser la bébora presente en tolos actos instucionales del Ayuntamientu tres la declaración aprobada pol Plenu municipal por unanimidá.

VI Asturianada y Sidra

Un eventu que nació de la mano del Primer Sidre l’Añu ye l’Asturiana y Sidra, qu’entama Xosé María García ‘Llábana’. Nesta ocasión va celebrase’l vienres y el sábadu del festival sidreru nel escenariu del tendayu magar les 17 hores y va contar cola presencia de cantantes de trés escueles de tonada. “Tratámosla d’una manera dalgo especial, diferente a lo que se suel facer nos certames o conciertos d’asturianada”, señaló Llábana, que destacó la presencia d’intérpretes de trés xeneraciones, cola participación de dellos rapazos y rapaces, “dando-y la oportunidá a la xente mozo de canciar delantre de públicu”.

El vienres van actuar los escolinos y escolines de la uviedina Escuela de Música Tradicional Manolo Quirós, Noemí Alonso y Laura Uría, de 8 y 9 años; y otros más mayores como Xuan Rodríguez, Virgilio Pato y Artemio Iglesias, amás de la maestra Anabel Santiago. Al día siguiente, ta prevista l’asistencia de la xixonesa Escuela de Música Tradicional La Quintana, con Ismael Tomás de profesor, que va trayer xente mozo como Andrea Menéndez, Vanesa Señas, Serxu Méndez y Belén Antón, y la Escuela de la Casa de la Cultura de Colunga, con Lorena Corripio como responsable y l’alumnu Luis Castiello como representante. En dambes xornaes va acompañar cola gaita Llorián García.

Na semeya, Martínez Salvador, Uría, Agüera y Llábana.