El Vetusta asciende a Segunda División B

El filial del Uviéu tornó a ganar al Mutilvera (3-1), mentes que l'UP Langreo sufrió pa pasar de ronda. El Sporting B va cruciase col Elche nel so camín a Segunda División A.

El 0-2 nel partíu d'ida daba mediu ascensu a los de Javi Rozada, pero'l Vetusta nun quixo especular col resultáu y foi pol trunfu n'El Requexón pa sentenciar la eliminatoria. El gol de Steven al comienzu de la segunda parte, xunío a la espulsión d'Antxon nel minutu 53, supunxo'l golpe definitivu pa los navarros, que pese a igualar el partíu nel 73 por mediación d'Adrián, acabó cayendo por un global de 5-1 na eliminatoria colos tantos de Viti y David González.

D'esta forma, l'equipu azul torna a Segunda División B 16 años depués del so descensu a Tercera. Nesti tiempu tuvo trés años ensin competir polos problemes económicos de la entidá, teniendo que comenzar otra vegada dende la segunda nacional.

L'ascensu del Vetusta permite que'l Siero conserve plaza en Tercera, al igual que l'AD Ribadedeva en preferente. Queden pendientes d'un segundu ascensu a Segunda B pa evitar el so descensu l'Avilés y el Turón.

Na prórroga

Del restu d'equipos asturianos que compiten por xubir a la categoría de bronce del fútbol estatal, namái l'Unión consiguió avanzar nel camín, anque non ensin sufrimientu. L'Alondras igualó'l 0-3 de la ida que llevaba la eliminatoria a la prórroga, onde los llangreanos pudieron salvar la papeleta gracies a los tantos d'Aimar y Pablo Acebal, con un 2-3 final.

Nun tuvieron la mesma suerte'l Marino y el Llanes. Los lluanquinos ganaron por 1-0 al UD San Fernando canariu, ventaya insuficiente pa dar la vuelta al 3-1 de la ida, mentes que los llaniscos tornaron goliaos de Portugalete (3-0) y nun aprovecharon el dexar a los vascos cola portería a cero en San Xosé.

L'Unión va conocer al so rival na segunda eliminatoria pasaes les 16.30 hores nel sortéu de Tercera División que va celebrase na Ciudad del Fútbol de Las Rozas, onde-y espera un tercer clasificáu o un segundu. Enantes debería comenzar el de Segunda División B, onde ta'l Sporting B, pero yá se conocen tolos crucies por mor de les normes afitaes pa los mesmos.

Victoria énte'l Cornellà

El filial roxiblancu foi meyor que'l Cornellà na vuelta celebrada en Mareo, ganando por 2-0 (4-2 nel global) gracies al tantu tempraneru de Cayarga (minutu 3) y al de Nacho Méndez nel tramu final (84). D'esta forma los de José Alberto pasen a la segunda eliminatoria de la fase d'ascensu a Segunda División A, onde van tener como rival a un clásicu del fútbol estatal, l'Elche.

El conxuntu d'Elx quedó terceru nel grupu III, el mesmu del Cornellà, con 3 puntos más que los catalanes. Al pasar dos cuartos clasificaos, éstos van enfrentase a los dos primeros que perdieron, el Mirandés y el Cartagena, mentes que la imposibilidá del Villarreal B de cruciase con otru del so grupu lleva a los castellonenses a vese les cares col Fuenlabrada y a los asturianos colos alicantinos.

D'esta forma, asina queden les elminatories: Elche-Sporting B, Fuenlabrada-Villarreal B, Extremadura UD-Mirandés y Celta B-Cartagena. Mentes, yá son equipos de Segunda'l Mallorca y el Rayo Majadahonda.

Otra manera, l'Izarra consiguió salvar la categoría tres superar a la Llagostera na eliminatoria pola permanencia (1-0 nel global). Tamién desciende l'AD Mérida tres empatar 2-2 col Coruxo pol valor doble de los goles fuera de casa.