El veranu torna a ser lliterariu en Corvera

Les neñes y neños que s’averen los llunes a la Biblioteca de Les Vegues tienen la oportunidá de vivir les sos histories favorites de la mano de los sos autores. Trátase del VII ‘Veranu Lliterariu’, iniciativa de la Casa de la Llingua-SNL de Corvera.

María Esther García López va ser la protagonista na sesión del llunes, que va desendolcase, como ye vezu, de 11.30 a 12.30 hores. La escritora va falar colos sos pequeños llectores de ‘Leo’, cuentu familiar y d’aventures basáu nun suañu que tien el neñu protagonista y que consiste nun viaxe enllenu d’imaxinación que lu tresporta dende la bañera de casa hasta la mesma New York.

Los siguientes en pasar pel ‘Veranu Lliterariu’ van ser Sidoro Villa, con ‘Nun-yos tengas perceguera’ (día 30); Xesús González Rato, con ‘El tractoría que quier dormir’ (6 d’agostu); Rafa Valdés, con ‘El rompicabeces corveranu’ (13 d’agostu); Vitu Pintado, con ‘Un nataliegu perbullindiegu’ (20 d’agostu); y Laura Peláez y David Fernández, con ‘De profesión, saltapraos’. Enantes acudieron Berto García, con ‘Cuadros con munchu cuentu’; Xurde Fernández Fernández, con ‘Antón quería ser porteru’ y ‘L’árbol de la verdá’; y Daniel García Granda, con ‘Amorina motosierra’.