El valencianu Mulet usa l'asturianu nel Senáu pa reclamar la oficialidá

El de Compromís, que tamién emplegó la variante lleonesa del idioma y l'aragonés, calificó al PNV d'insolidariu por nun apoyar la so enmienda sobre la Carta Europea.

En concreto los nacionalistes vascos pretendíen esixir al Gobiernu estatal'l cumplimientu de la Carta Europea de les Llingües Rexonales o Minoritaries y del artículu 3 de la Constitución entamando polítiques de proteición y respetu a les llingües cooficiales, y que se tuviera en cuenta la realidá sociollingüística nos procesos de seleición de personal de l'Alministración estatal. Compromís incluyó enmiendes a esta moción na que pidía financiación pa les autonomíes billingües pa la promoción del idioma propiu, el fomentu de planes d'usu y la creación de la especialidá docente d'aquelles llingües con reconocimientu xurídicu non oficiales, como l'asturianu.

Na so intervención, Carles Mulet defendió la oficialidá de la llingua asturiana y amosó un cartelu d'una campaña d'Iniciativa pol Asturianu na que sal un corazón col lema 'Oficialidá ye futuru pal asturianu'. L'EAJ-PNV refugó toles enmiendes de Compromís a una moción que tuvo l'apoyu del PSOE, Xuníos Podemos, ERC, PDeCAT, Coalición Canaria y EH Bildu, y que valtó'l PP, con mayoría absoluta nel Senáu, xunto con Foro y UPN.