El V Outono Cultural de Bual centra la so actividá nesti sábadu

El festival de música, arte y lliteratura de l’Asociación Xuvenil Mezá, l’Outono Cultural, va celebrase’l sábadu en Bual col oxetivu de dar vida al occidente del país. Nesta ocasión, los organizadores van centrar toles actividaes nuna sola xornada.

La presentación del Outono Cultural va tener llugar al meudía con un actu na Casa de Cultura nel que van participar Andrés Rodríguez Monteavaro, miembru organizador de l’Asociación Xuvenil Mezá; José Antonio Barrientos, alcalde de Bual; y el músicu Xosé Antón Fernández ‘Ambás’. Darréu, Llorián García va dar una ponencia entitulada ‘Gaiteiras y pandereteiros. Xénero, tresxénero y poder na música tradicional asturiana’, basada na so tesis presentada recién. Yá pela tarde, a les 18 hores, l’activista y teóricu de la zona rural del país Gerardo Fernández va falar de ‘A morte del mundo rural en Asturias’.

La música tamién va tener un protagonismu especial a partir de les 19.30 hores. El primeru n’actuar va ser Alejandro Martínez Ares, acordionista nacíu na población de Ronda que resultó ganador estatal n’Ourense nel 2010 del certame d’esti instrumentu na categoría ‘Senior Clásica’. De siguío, a les 20.15 hores, va ser el turnu del tríu De Miguel, Wolfe y Quintana dientro de la so xira de presentación de ‘Xota pa tres’. Pa zarrar la xornada, y como novedá, l’actividá va tresllada de la Casa de Cultura a la discoteca Benymar, onde ta previstu un conciertu de La Tarrancha (00.30 hores), tamién presentando’l so discu últimu ‘Mezigayuska’, y una pinchada de música reggae y ska por parte d’El Corrector, nomatu utilizáu por Rafa R. Valdés.

L’Asociación Xuvenil Mezá completa asina una xornada cargada d’actividaes alredor de la cultura asturiana pese a la perda de la subvención por mor de los recortes fechos pola Direición Xeneral de Política Llingüística, dalgo que llevó a los sos miembros a concentrar l’Outonu Cultural el sábadu a diferencia d’ediciones anteriores, que contaba con trés díes de llargor. El Conceyo de Bual –con parte d’aportación económica propia y con una ayuda del Gobiernu–, la Caxa Rural, l’Asociación d’Hosteleiros de Bual y dalgún de los bares y establecimentos de la zona collaboren col coleutivu mozu nel entamu d’esti festival de música, arte y lliteratura.