El V Concursu de Semeyes de La Sidra viaxa hasta Inglaterra

El fotógrafu inglés Bill Bradshaw llevóse’l V Concursu de Semeyes de La Sidra col trabayu entituláu ‘Falling apples’. Nesta edición del certame de fotografíes sidreres participaron 145 persones de tol mundu con 563 imaxes.
 
‘Falling apples’ muestra decenes de mazanes cayendo del árbol, una imaxe que destaca pola so variedá de colores y orixinalidá. Esta obra de Bradshaw foi la meyor según el xuráu formáu polos fotoperiodistes Xurde Margaride y José Simal, el direutor del Centru Integráu d'Imaxe y Soníu de Llangréu, Jerome Muñoz, y los fotógrafos d'estudiu Lorena Ayala y Carlos Manuel López. Pol so trabayu, el fotógrafu inglés llevóse un premiu de 600 euros, 500 en metálicu y 100 en llibros.
 
El segundu premiu d’esta quinta edición del concursu de la revista La Sidra foi pa 'Astigarraga',  mentes que'l terceru llevólu 'Figura I'. Otra manera, el premiu especial Sidra JR, dotáu con dos caxes de sidra del llagar xixonés, foi pa 'Mayando fuerte', según informó la organización del certame de fotografía sidrera. Nesta ocasión, tornó a destacar la participación d’autores de fuera del país, n’especial de Madrid, dientro del Estáu, y d’Inglaterra y Rumanía, nel restu d’Europa. Tamién hubo concursantes americanos, con dellos trabayos procedentes de Colombia. Los meyores trabayos van poder vese en xineru na sidrería La Galana, en Xixón.