El TXXE declara illegal los contratos temporales pa necesidaes permanentes

SUATEA anuncia, tres conocer la sentencia, una campaña pa esixir al Gobiernu estatal que fine cola inestabilidá del profesoráu.

El fallu del Tribunal de Xusticia de la Xunión Europea (TXXE), del 14 de setiembre tres una denuncia d'una funcionaria interina del serviciu de salú de la Comunidad de Madrid, declara que les alministraciones públiques del Estáu español tán cometiendo un fraude de llei al encadenar contratos temporales cuando éstos deberíen de ser fixos". Los efeutos, que yá taben reconocíos pal personal llaboral, tienen d'estendese agora al personal funcionariu interín de cualquier Alministración pública, como la Sanidá, la Educación o la Xusticia.

“Nun se podrá tratar a los trabayadores con un contratu de duración determinada d'una manera menos favoratible qu'a los trabayadores fixos comparables pol fechu de tener un contratu de duración determinada”, entiende'l TXXE, que tamién señala “que los nomamientos de duración determinada nun se pueden renovar pa desendolcar funciones permanentes y estables incluyíes na actividá normal del personal estatutariu fixu”. Amás, denuncia que l'Alministración pública del Estáu español "nun tien llexislación que lu obligue a crear puestos estructurales, lo que lu dexa abusar de la ufierta repitida pa la so cobertoria de places en réxime d'interinidá, colo que la situación de precariedá de los y les trabayadores conviértese en permanente", espiquen dende'l Sindicatu Unitariu y Autónomu de Trabayadores de la Enseñanza d'Asturies (SUATEA).

Amás, esta organización recuerda que nel Estáu más de 100.000 profesores sufren cada añu'l despreciu de l'Alministración y vense obligaos a camudar de puestu de trabayu cuando les necesidaes qu'atienden son permanentes. L'alumnáu y la comunidá educativa polo xeneral sufren esta falta d'estabilidá que se traduz inclusive en qu'hai centros que camuden a tol so profesoráu d'un cursu pa otru y qu'al entamu del mesmu nun tienen nin siquier equipu directivu". Esta situación ye entovía más insostenible n'Asturies "onde la tasa d'interinidá ta al rodiu'l 30 por cientu y esiste un Alcuerdu de profesoráu interín suscritu pola Alministración, ANPE y UXT nel que la so base ye la rotación nel emplegu, daqué que ta acabante de ser declarao contrario a derechu de la Xunión Europea".

Midíes inmediates

Por mor de la sentencia del TXXE, SUATEA va proponer a la Confederación de STEs Intersindical el desenvolvimientu d'una campaña pa esixir al Gobiernu en funciones del Partido Popular "qu'adopte con calter inmediatu midíes qu'acaben con esta llaceriosa situación nel mundu de la enseñanza pública, pa encamentar a los grupos políticos a que pongan en marcha inicitives llexislatives pa entamar una solución xusta y digna pal profesoráu interín y pa esixir la inmediata convocatoria de la Mesa Sectorial d'Educación onde s'encete la transposición de la xurisprudencia europea pa llograr l'allampada estabilidá d'esti coleutivu". D'igual forma, pretende movese nel ámbitu del país "pa que la precariedá y la inestabilidá llaboral s’acaben".

Nesi sen recuerda que'l Parllamentu asturianu "yá se manifestó pa que s'abra una negociación sobre'l profesoráu interín". "La sentencia de los tribunales europeos supón un nuevu barganazu a les Alministraciones que como l'asturiana siguen encerriscaes en promover la rotación nel empléu y la inestabilidá llaboral", afirma'l sindicativu educativu.