“El turismu vien a Asturies a buscar una identidá, qu’inclúi tamién la llingua”, afirma Piñán

La conseyera de Cultura, Política Llingüística y Turismu, Berta Piñán, participó nuna entrevista na primer edición del programa ‘Asturias Hoy’ de RPA. Centrada sobre manera nel turismu, la cuestión de la oficialidá tamién se trató, siendo la escritora optimista na posibilidá de reformar l’Estatutu d'Autonomía pa incluyila nesta llexislatura.

“De momento tovía fai falta un votu pa llegar a esa proporción –trés quintes partes de la Xunta Xeneral–, pero eso nun quier dicir que yo, como conseyera, y el mio equipu, nun tenga la ilusión, y amás el convencimientu, de qu’a lo llargo d’esta llexislatura podemos llegar esa confluencia y a esa coxuntura específica que nos lo permita”, apuntó, al tiempu qu’aseguró que mientres tanto “queremos avanzar en política llingüística”. Nesi sen citó l’avance que supón la convocatoria del esame de conocencia d’asturianu adaptáu al Marcu Común Européu de Referencia pa les Llingües, nel nivel B2 pa esti añu, “un tema importantísimu”, amás d’otros sobre educación, normalización y toponimia “que nos permitan esa normalidá; que cuando lleguemos a la oficialidá cuasi nun nos enteremos tanto porque yá tenemos avanzao esi terrén con una cierta naturalidá”.

Sobre quién podría sofitar esa reforma del Estatutu, amás de los partíos yá conocíos, Piñán llendóse a dicir que “cualquiera que creyera n’Asturies y en que tenemos posibilidaes de la meyor Asturies, y que tenemos posibilidaes d’un desarrollu cada vez más optimista de la nuesa cultura y como seña identitaria de la nuesa economía y del nuesu proyeutu común como sociedá; cualquiera tendría qu’apoyar esta reforma y esta cooficialidá”. No que respeuta a los costos posible, aseguró qu’habría d’entrugase “cuánto nos aporta, non sólo en partíes direutes de subvenciones que nos correspuenden tanto dende l’Estáu español como dende Europa, sinón na propia idea de que la cooficialidá d’una llingua inclúi esi dibuxu d’una Asturies con una identidá propia, que nun quier dicir escluyente, que ye tamién la que vien a buscar el turismu. El turismu vien a buscar una identidá que ta compuesta de munchísimes coses, d’una sociedá y una cultura, qu’inclui tamién la llingua”.

Al insistir nel tema d’una cantidá concreta de lo que cuesta la oficialidá, la conseyera apuntó que “les cantidaes van cambiando col tiempu”, poniendo como exemplu’l desarrollu del Eslema p’ameyoralu cola fin del so emplegu na Alministración asturiana. “Los costos que se calculaben hai cinco años queden agora en 0. Esto ye una de les maraviyes de les nueves teunoloxíes”, apuntó esplicando la dificultá d’afitar anguaño una cifra.

Na semeya, Piñán nel estudiu de RPA mientres la entrevista.