El TSXA ratifica l'anulación del nomamientu d'Alarcos como ayudante doctor

La Universidá d'Uviéu nun recurriera la sentencia primera d'un xulgáu uviedín.

Miguel Alarcos accedió a esti puestu en branu del 2013, momentu nel qu'exercía de profesor ayudante a tiempu completu. Una decisión del Vicerrectoráu de Profesoráu y Ordenanción Universitaria tresformó esa plaza na d'ayudante doctor, dalgo de lo que tamién se beneficiaron una decena de persones y que llevó a una profesora a recurrila énte'l Rectoráu. Al nun avanzar la so quexa, decidió tomar el camín de los tribunales, algamando la razón nuna sentencia del xulgáu de lo Contencioso Alministrativo númbero 5 d'Uviéu.

L'hasta agora ayudante doctor de Filoloxía Llatina recurrió énte'l Tribunal Superior de Xusticia d'Asturies (TSXA), camín que nun tomó la Universidá d'Uviéu, qu'agora ratifica la sentencia, anulando'l nomamientu d'Alarcos El fíu d'Emilio Alarcos provocó recién una polémica importante nes redes sociales al afirmar que la llingua asturiana ye “una puta mentira” de la que s’aprovechen “políticos y filólogos paletos”.