El TSXA encamienta a la Sindicatura de Cuentes a anular los puestos a deu del organismu

El TSXA comunicó al Conceyu por Otra Función Pública n’Asturies (COFPA) el resolvimientu qu’encamienta a la Sindicatura de Cuentes a anular los puestos a deu nel organismu. La sentencia envalora un recursu presentáu pol COFPA en mayu del añu pasáu.

Esta sentencia del Tribunal Superior de Xusticia (TSXA) tresllada a la Sindicatura de Cuentes la obligación d’anular los puestos de llibre designación d'esi organismo “nos sos propios términos que nun son otros que dexar ensin efectu na rellación de puestos de trabayu oxetu del recursu los relativos a los de llibre designación como sistema de provisión, ensin que sía torga pa ello la oposición a desenvolver una rellación nueva de puestos de trabayu que diz faen determinaos miembros del Conseyu de la Sindicatura”, señalen dende’l COFPA, que presentó’l recursu’l 14 de mayu del 2010. D’esta forma, fina l’usu del sistema dixital de nomamientu de la llibre designación nos puestos de trabayu de lletraos (2 puestos), auditores (4), xefe d'alministración y subdireutor de
fiscalización.
 
COFPA informa que “la Sindicatura de Cuentes alegara ante la sala de los contencioso-alministrativo que nun pudo executar la sentencia porque dalgún de los síndicos opondríase a ello. Frente a esta escusa, el TSXA recuerda a la Sindicatura lo obvio, esto ye, que'l cumplimientu de les sentencies firmes nun pue quedar condicionáu a supuestes disensiones internes nel órganu obligáu al so cumplimientu y da un plazu perentoriu de 20 díes al Conseyu de la Sindicatura pa informar al Tribunal sobre l'estáu que caltien la execución de la sentencia”.