El TSXA da’l preste a un recursu de la CSI y dexa en suspenso la carrera profesional

El Tribunal Superior de Xusticia d'Asturies decretó esta selmana la suspensión cautelar de la "carrera profesional" qu'afecta a cerca de 20.000 funcionarios de l'alministración autonómica, atendiendo'l recursu que presentare'l l sindicatu Corriente Sindical d'Izquierdes, qu'aseguraba que la propuesta del Gobiernu asturianu a los sos trabayadores nun tenía conteníos reales definíos y qu'incumplía delles lleis que l'afectaben.

CSI aseguró que la suspensión cautelar se pidióse "precisamente pa evitar los daños económicos irreparables que se produciríen pa los empleaos que decidieren non firmar la so pertenencia a la carrera al considerar que tienen derechu a conocer previamente los requisitos, condiciones y posibles consecuencies de la so adhesión".

Mientres dende CSI denúnciase que la carrera "supón una supeditación a una evaluación del trabayu desarrolláu que nos allega peligrosamente a modelos d'empresa privada nos que se prima la negociación individual de les nuestras condiciones de trabayu sobre la negociación colectiva" y asegura qu'enantes de desarrollar la carrera ha aprobase una Llei de Función Pública que concrete'l so conteníu y condiciones, ello al marxe de qu'al sindicatu la carrera abúlta-y "abiertamente clasista al espurrir más l'abanicu salarial" y cree que va "abrir una carrera competitiva ente compañeros pa ganar la valoración".



Dende'l Gobiernu, fontes oficiales manifestaron la intención del Executivu de "defender" l'alcuerdu firmáu colos sindicatos mayoritarios na Alministración pública, UXT y CC.OO, nel mes de payares del 2006, y por ello van presentar el próximu llunes un recursu. Sicasí, l'Alministración reconoció que nun presentó la so oposición nos plazos permitíos a la suspensión cautelar de la carrera profesional solicitada pola Corriente Sindical d'Izquierdes por causa "d'un error".