El TSXA anula'l plan urbanísticu xeneral de Llanes

La formación política nacionalista Andecha Astur dio a conocer güei la sentencia emitida pola Sala de lo Contencioso Alministrativo del Tribunal Superior de Xusticia d'Asturies pola que s'anula'l Plan Xeneral d'Ordenación Urbana de Llanes, primer conceyu turísticu del oriente d'Asturies y nel noyu de la polémica nos últimos años pola masificación urbanística que sufre, un procesu nel que rescamplen actuaciones como la urbanizaciónde La Talá.

L'anulación, consecuencia de la denuncia que punxere nel so día la organización política inxerta agora na coalición "Unidá" afirma que'l PGOU llaniscu nun nun s'axusta al ordenamientu xurídicu. La denuncia d'AA encontábasese nun problema de forma pola inexistencia del trámite de nueva información pública del documentu, que la CUOTA aprobare en xunetu del 2002 y que dempués volviere a aprobar con un "testu refundíu" n'abril del 2003. El testu refundíu amestaba dellos encamientos fechos dende la mesma CUOTA pa iguar dellos defectos observaos nel PGOU inicial y pa inxerir 16 de los 54 recursos que presentaren otros tantos particulares. La non esposición a trámite públicu d'esti nuevu documentu llevó finalmente a la sentencia del tribunal que preside'l xuez Julio Gallego Otero, que considera que l'inxerimientu de cambeos bultables nel planeamientu urbanísticu que suponía'l testu nuevu "obligaba a abrir un trámite nuevu d'información pública que garantizare la participación de los ciudadanos nel procesu d'ellaboración de la norma". AA camentaba dende un principiu que la presencia de planes parciales como los de La Talá, Los Altares y La Llavandera, sobre los que los ciudadanos nun tuvieron portunidá d'opinar, diba ser argumentu abondu pa que'l TSXA refugare'l plan.