El TSXA anula'l decretu del Plan d'Usu y Xestión del Parque Natural Fontes del Narcea

La razón ye la omisión de la preceptiva memoria económica y la falta de planes añales de xestión.

Pilar Martínez Abogados anunció esti fallu del Tribunal Superior de Xusticia d'Asturies (TSXA), que dio asina nueve sentencies favoratibles a los pidimientos de nulidá presentaos pola propia lletrada Pilar Martínez y los abogaos Manuel Paredes y Florentino Quevedo en representación de l'Asociación de Propietarios de Montes en Comunidad Romana (ASPROCORO) y otros titulares individuales de terrenos afeutaos. El tribunal reconoz la falta de memoria económica qu'identifique los instrumentos financieros necesarios, previsiones y partíes definíes pa, per un llau, cumplir colos fines persiguíos cola declaración d'espaciu natural protexíu y, per otru, indemnizar y compensar a los afeutaos pola llenda de derechos previamente consolidaos. D'igual forma, estima que'l plan de desarrollu sostenible del Instrumentu de Xestión Integral (IXI) aprobáu nel 2014 carez d'actividaes añales, oxetivos y llinies maestres d'actuación, asina como de previsión d'inversiones destineas a tal fin.

Poro queda anuláu'l Decretu qu'aprobaba l'IXI nuevu de dellos espacios protegidos del Parque Natural de Fontes del Narcea, Degaña y Ibias, y que lu declaraba Zona d'Especial Conservación. Deberá redautase entós un instrumentu nuevu de xestión que tendrá que “contar ineludiblemente, per un lláu, con una memoria económica qu'incluya partíes presupuestaries reales pa facer frente a les compensaciones y indemnizaciones poles restricciones qu'esti instrumentu supón pa los derechos individuales previamente consolidaos y, per otru llau, con un real y efeutivu plan añal d'inversiones pa les zones afeutaes”, señala Martínez, que solicitó al TSXA que precise'l términu "nulidá parcial' que cita nel fallu.

Crítiques de Foro a la xestión socialista

L'ex diputáu y presidente de la Comisión d'Estudios d'Agroganadería y Medio Ambiente de Foro, Juan Ramón Campo, señaló que l'anulación del decretu "demuestra l'erroneu modelu socialista de la xestión de los espacios naturales" y recordó que “la Parroquia Rural del Parmu, en Teberga, instó xudicialmente la nulidá del IXI del Parque Natural de Les Ubines-La Mesa por idénticos motivos a los que motivaron l'anulación del de Fontes del Narcea, Degaña e Ibias, razón que fai prever que tamién esi instrumentu pueda resultar anuláu, too ello pola gafa xestión socialista arrastrada mientres décaes que semó'l descontentu ente los vecinos afeutaos por unos documentos plagaos de restricciones y con mui poques o nules compensaciones qu'afloren per tolos costaos”. Dada la situación, asegura que “urxe tramitar la Proposición de Llei aprobada recientemente a instancies de Foro que permitirá a los titulares de derechos afeutaos formar parte de les Comisiones Rectores pa tratar d'evitar que se repita'l tradicional abusu socialista sobre los habitantes de los espacios naturales, yá qu'hasta ahora se decidía al so llombu inclusive en contra de los sos intereses a pesar de que, en casos como'l Parque de Fontes del Narcea, Degaña e Ibias, más del 90 por cientu de la propiedá ye privada”.