El Tribunal Supremu avala la salida de Franco del Valle de los Caídos y el so treslláu a Mingorrubio

Los seis maxistraos de la Seición Cuarta de la Sala de lo Contencioso-alministrativo del Tribunal Supremu refugaron por unanimidá’l recursu de la familia Franco sobre’l desenterramientu del dictador y avalaron la decisión del Gobiernu estatal. Los sos restos treslladaránse al cementeriu de Mingorrubio, n’El Pardo, onde ta la so muyer Carmen Polo y dellos altos cargos franquistes.

Francinsco Franco nun va dir a La Almudena, como deseaben los sos allegaos. Tres una hora d’alderique, los xueces decidieron dar la razón al Executivu de Pedro Sánchez, polo que’l so cadabre va salir del Valle de los Caídos, anque non de manera inminente.

La razón ye que sigue abiertu un procedimientu nel Xulgáu de lo Contencioso-alministrativo númberu 3 de Madrid que tien paralizada la llicencia d’obra pa llevantar la llosa de la tumba del dictador. La sentencia tien posibilidá de recursu, al igual que la del Supremu –entovía non redautada–, cola familia decidida n’acudir al Tribunal Constitucional.

El destín final de los restos de Franco será’l cementeriu d’El Pardo, conocíu como Mingorrubio. Nél descansa, amás de la so esposa, numberos altos cargos franquistes, como Carlos Arias Navarro o Luis Carrero Blanco.

Semeya obra d'Alkarrier baxo llicencia CC BY-SA 3.0.