El Tribunal Superior de Xusticia de Catalunya salva’l modelu catalán d’inmersión llingüística

El catalán va continuar siendo llingua vehicular nes escueles de Catalunya. El Tribunal Superior de Xusticia del país mediterraneu salva’l modelu catalán d’inmersión llingüística, anque con dellos matices.
 
Asina, la resolución del TSXC recueye que la Generalitat tien qu'ofrecer atención llingüística individualizada a les trés families demandantes que queríen clases en castellanu. Según l'autu de los maxistraos, nel que s'estima parcialmente'l recursu de la Generalitat, "nun se pue facer un pronunciamientu xeneral sobre l'usu del castellanu como llingua vehicular pola llectura descontestualizada y lliteral d'una frase del fallu del Supremu" sobre'l pidimientu d'estes trés families. Agora, el TSXC dexa ensin efeutu la so resolución de setiembre del 2011, polo que "caltién el modelu que nesti momentu ta desarrollándose" y qu'implica que les escueles de Catalunya van caltener el catalán como llingua vehicular de la enseñanza.
 
La sentencia del Tribunal Supremu, emitida n'avientu del 2010, obligaba a la Generalitat a incorporar el castellanu como llingua vehicular de la enseñanza, alegando la so cooficialidá nel territoriu. Les families alegaron entós al TSXC pa reclamar el cumplimientu del fallu del Supremu y l'altu tribunal catalán allinióse con él, obligando a la Generalitat a incluyir al castellanu como llingua vehicular, lo que'l Govern recurrió. Agora’l, TSXC da parcialmente la razón a la Generalitat, anque esclaria que "tien la obligación d'adoptar les midíes que menta l'autu en rellación a la enseñanza que s'imparte a los fíos del recurrente, reconociéndose en tal sentíu la so situación xurídica individualizada", que ye la introducción del castellanu como llingua vehicular nesos casos.
 
D'ente los 22 xueces del Plenu, 21 votaron a favor d'estimar  parcialmente'l recursu, mentes que la maxistrada Núria Cleries anotó'l so votu particular pidiendo la estimación na totalidá del mesmu. La xuez defendió que'l catalán ta nuna situación minoritaria nes escueles y que les families demandantes yá recibieron esta atención individualizada en castellanu, con circulares del centru nesti idioma. La Generalitat yá tien un serviciu p'atender a les families que piden más atención en castellanu, anque les families recurrentes considérenlu insuficiente. Pela so parte, l'abogáu de Convivencia Cívica Catalana (CCC), Ángel Escolano, avanzó que va recurrir la decisión del TSXC nun plazu de 10 díes.