El tresporte européu lliberalízase n'Asturies

Mes y mediu depués del Ecofin, cuando Uviéu fue l'escenariu pa la xunta de los ministros d'economía de la UE, agora ye Xixón la ciudá que sirve d'escenariu a un nuevu conceyu de ministros, nesti casu de tresporte. La lliberalización de toles rames del tresporte, con especial atención a la navegación, ye'l noyu del debate que va facese ente güei y mañana nun escenariu arrodiau de midíes de seguridá peliculeres qu'inclúin hasta francotiradores nos teyaos de les cases alredor del Hotel Tryp Rey Pelayo, onde aconceyen los ministros.Nun contestu de crecimientu espectacular del tresporte na UE, los ministros van aprovechar estos díes pa dir apautando les estratexes dintegración y coordinación de les estremaes estayes que componen el mundu del tresporte. En munchos casos, como'l ferrocarril, los países de la UE quieren baltiar les vieyes fronteres estatales col enfotu d'encadarmar una serie de corredores xestionaos por grandes operadores loxísticos. Nel casu de l'aviación, el cielu únicu européu prepara un espaciu aéreu pel que van circular el doble d'aviones, mientres que na carretera, l'aplicación del Plan Petra del Ministeriu de Fomentu da les pautes pa un procesu de fusiones empresariales nun contestu de crecimientu del negociu, por muncho que'l ferrocarril vaya quita-y porcentaxe de cargues a la carretera. P'acabar, el tresporte marítimu prepárase la lliberalización de servicios nos puertos, l'espoxigue del tráficu de contenedores a pequeña distancia y la competencia ente instalaciones portuaries. La UE presenta esti procesu como la vía pa un futuru de desarrollu sostenible, pero tampoco nun hai qu'escaecer que tres los documentos oficiales escuéndese la precarización del emplegu, un inevitable aumentu de la contaminación y la construcción de nueves infraestructures que xeneren un gran impactu mediuambiental