El toque de queda adelantáse a les 22 hores a partir del xueves

De les 23 a les 22 hores. El Gobiernu adelanta una hora’l toque de queda pa frenar l’espardimientu del coronavirus SARS-CoV-2 na tercer fola de la pandemia, midida que va entrar a valir el xueves, a la que se suma el zarru perimetral de Grau dende’l martes.

El Boletín Oficial del Principáu d’Asturies (BOPA) va espublizar esta tarde un decretu robláu pol presidente Adrián Barbón nel que se van afitar estes restricciones. Mentes, el conseyeru de Salú, Pablo Ignacio Fernández Muñiz, y el direutor xeneral de Salú Pública, Rafael Cofiño, van informar a les 18.30 hores de los detalles d’una segunda resolución que va actualizar les midíes estraordinaries pa la prevención, contención y coordinación de la COVID-19.

El Gobiernu yá anunció que la decisión principal va ser l’adelantu del toque de queda. Ésti pasa a ser de 22 a 6 hores, coles esceiciones yá conocíes.

Mentes, l’aumentu de casos detectáu en Grau tres les fiestes navidiegues, lleva al Executivu a establecer un zarru perimetral nel conceyu per 14 díes, hasta'l 25. La incidencia acumulada a 14 díes yera’l vienres de 582,6 casos cada 100.000 habitantes.

Na semeya, la plaza'l Mercáu de Grau, cola estatua n'homenaxe a les vendedores.