El topónimu tradicional Uviéu, agora oficial, desapaez del cartelu de les fiestes de San Mateo

"La toponimia ye una parte de la cultura de la ciudá d’Uviéu y nun puede ser un elementu de división", defende Iniciativa pol Asturianu.

Dende'l mes de marzu'l topónimu oficial de la capital del país ye billingüe, Oviedo/Uviéu. Sicasí, el gobiernu muncipal nuevu, conformáu pol Partido Popular (PP) y Ciudadanos, sigue incumpliendo la única toponimia llegal del conceyu, la tradicional, una vegada derogada la castellanizada salvo en dalgunes esceiciones nes que se caltién una denominación doble.

El cartelu de les fiestes de San Mateo ye un exemplu nuevu d'esta situación. Tres l'usu nos años últimos por parte del tripartitu PSOE, Somos y Izquierda Xunida (IX) del nome de llugar 'Uviéu', inclusive ensin ser oficial, nel de la edición d'esti añu la única forma que s'emplega ye 'Oviedo'.

“Dende va unos años venía utilizándose’l topónimu d’Uviéu en diferentes publicaciones municipales, inclusive gobernando Gabino de Lorenzo”, recuerda Iván Llera, presidente d'Iniciativa pol Asturianu, qu'añade que la “la Llei 1/1998, de 23 de marzu, d’usu y promoción del asturianu aprobada por el PP establez nel so Artículu 15.1 l’usu y la promoción de los topónimos tradicionales”. “La toponimia ye una parte de la cultura de la ciudá d’Uviéu, una seña d’identidá como les propies fiestes mateínes y nun pue ser un elementu de división porque esa división nun esiste na sociedá uvieína”, sigue'l periodista, que pide al gobiernu municipal "un usu normal de los nomes tradicionales de la ciudá y los pueblos”.