El territoriu asturianu del Parque de Picos va tener un presupuestu de 1,6 millones d'euros

|
Pandebanu

María Jesús Álvarez participó en Valladolid na comisión de xestión del espaciu protexíu.

El territoriu asturianu del 'Parque Nacional de los Picos de Europa' va cuntar anguaño con un presupuestu global de 1,6 millones, según alcordó güei la comisión de xestión del espaciu protexíu na xunta celebrada en Valladolid y a la qu'asistió la conseyera de Desarrollu Rural y Recursos Naturales. Mientres l'alcuentru, nel que participaron tamién los conseyeros del ramu de Castilla y Lleón y Cantabria, Juan Carlos Suárez-Quiñones y Jesús Miguel Oria, de manera respeutiva, avanzóse nel plan d'actuaciones del parque pa esti exerciciu.

Según les previsiones, na parte asturiana van dedicase 288.000 euros a encarar los gastos rellacionaos col usu públicu del parque, esto ye, la regulación d'accesu a los Llagos de Cuadonga o la información y sofitu a l'accesibilidá na zona de Poncebos y otros espacios. Tamién se van destinar 96.000 euros a la prevención de quemes y 75.000 al caltenimientu de pistes d'usu ganaderu. Pal mantenimientu d'infraestructures d'interés rural va disponer de 74.000 euros, mentes qu'otros 54.000 van dedicase a roces.

Los presupuestos inclúin, amás, una partida de 27.000 euros pa repoblar un sector quemáu na cuesta de San Xinés y otra de 15.000 pal arreglu de pasos canadienses en zones venceyaes al sistema d'accesu a los llagos en tresporte públicu. El siguimientu de poblaciones de fauna singular va cuntar con 15.000 euros, la mesma cantidá que va sirvir pa financiar el siguimientu de la fauna montesa y la ganadería.

La partida pa obres de meyora del centru de visitantes de Buferrera, pela so parte, xube a 50.000 euros. La comisión trató tamién los distintos proyeutos esternos al parque que pretende acometese anguaño, como'l refuerzu del suministru d'agua en Sotres y un cabestrante p'aportar a la cueva quesera de Teyedu, dambos en Cabrales.

Conveniu pal desenvolvimientu del proyectu Sccale

Na reunión de trabayu analizóse, asina mesmo, la firma d'un conveniu ente'l consociu del parque y l'Instituto Geológico y Minero de España (IGME) pal desenvolvimientu del proyeutu Sccale, relativu al estudiu del llagu Enol. Trátase d'una monitorización continua de les condiciones físiques, químiques y biolóxiques de la masa d'agua y la puesta en marcha de midíes d'información y concienciación de la sociedá de la redolada: escolares, ganaderos, hosteleros y visitantes.

Los trés conseyeros dieron cuenta de los distintos trámites polos que tien de pasar el Plan Rector d'Usu y Xestión (PRUX) del espaciu protexíu. Desque concluyó'l procesu de participación pública inicial, nel que se realizaron 18 xuntes con coleutivos que representen el rangu más ampliu posible d'intereses, ta ellaborándose el borrador pa empecipiar la tramitación alministrativa. Prevése que tea concluyida a finales del próximu branu y que'l documentu s’apruebe nel 2018, fecha que va coincidir col centenariu de la declaración del antiguu 'Parque Nacional de la Montaña de Covadonga', con proteición ampliada nel 1995 pa convertise nel actual de Picos d'Europa.

La xunta foi la primera que celebra la comisión anguaño y nella, amás de los asuntos preparatorios pal alcuentru del patronatu, que va celebrase’l 20 de marzu, tratáronse tamién cuestiones rellacionaes cola organización interna del parque, ente les que figuren aspectos como la tramitación alministrativa (pagos d'espedientes de responsabilidá patrimonial por daños o procedimientu d'emisión d'informes), cola mira d'ameyorar nel tiempu de rempuesta al ciudadanu.

Contador Estadistiques