El temporal abandona Asturies depués de trés díes d’agua y nieve

Ochobre despídese col mayor temporal que se recuerda nesti mes nos años últimos. Dende la nueche del vienres hasta esti llunes Asturies vivió xornaes de muncha agua y nieve que, sumao a que los árboles nun perdieron entovía les sos fueyes, acumuló numberosos problemes pola cayida d'exemplares y cañes.

L’iviernu quixo adelantase esti añu y traxo a ochobre un temporal más habitual d’esta estación que de la seronda. Cortes de cables d’alta tensión y de carreteres pola cayida d’árboles o cañes, que nun aguantaben el pesu de la nieve pola presencia entovía de fueyes, provocaron los problemes mayores, dexando ensin lluz a 13.500 persones y ensin llinia móvil a habitantes de Casu, Cangas del Narcea, Allande, Degaña, Ayer, Teberga, Somiedu, Ibias, Ḷḷena y Quirós, y incomunicando Asturies cola meseta tanto per tren como por carretera.

La situación va ameyorar nes hores próximes, lo que llevó a l’Axencia Estatal de Meteoroloxía (Aemet) a desactivar toles alarmes por mal tiempu nel país, anque la lluvia va acompañanos mientres tola selmana. Sicasí, les consecuencies del temporal van quedar, lo que llevó al Gobiernu a solicitar la intervención de la Unidad Militar de Emergencias tres declarar el pasu a situación 2 del Plan de Nevaes.

Nueves puertos zarraos

Na tarde d’ayeri había rexistraes 169 incidentes rellacionaos con cortes de carretera, principalmente por árboles cayíos, en 17 conceyos. Nestos momentos ta zarráu’l pasu en San Isidro, Altu de Carricéu, El Counio, Tarna, Arniciu, La Cobertoria, Somiedu, San Ḷḷorienzu y Ventana, mientres que ye necesariu l’usu de cadenes n’otros 13 puertos.

El númberu de carreteres cortes supera la ventena, mientres que s’aconseya precaución pa circular pol puertu Payares y pela autopista del Güerna. Pue consultar al momentu l’estaú de les víes asturianes calcando nesti enllaz.