El Telecable raspió la primer Copa Intercontinental femenina

|
Telecable Xixón Solimar

Les xixoneses viéronse superaes pol Concepción Patín Club tres el descansu.

Nun pudo ser. La primer Intercontinental femenina de ḥoquei sobre patinos, qu'enfrentaba a los dos meyores clubes d'Europa colos dos meyores de Sudamérica n'Arxentina, nun viaxó finalmente a Asturies.

El Telecable Hockey Club, actual campeón continental, algamaba la final tres superar al arxentín Andes Talleres de Godoy Cruz por 4-3, onde esperaba l'anftrión, el Concepción de San Juan, primeru de Sudamérica, que vencía pol mesmu resultáu al Benfica. Les de Fernando Sierra, que contaron con un pequeñu grupu d'aficionaos sofitando dende la grada con banderes asturianes ente los 7.000 espectadores presentes nel pabellón Aldo Cantoni, foron dende'l primer momentu pola victoria, como amuesa que llegaran al descansu con resultáu favoratible de 1-2.

Sicasí, les arxentines, lideraes pola ex xugadora del club xixonés Luchi Agudo y por María Florencia Felamini, autora de los trés goles llocales nesti periodu, consiguieron dar la vuelta al partíu impidiendo otra gran xesta del Telecable. Al final, el marcador reflexó un 4-2 pal Concepción.

El Barça Lassa , campeón masculín

La Intercontinental fememina compartió sede y feches cola masculina, que llevó'l Barça Lassa nuna final con color européu protagonizada por dos clubes futboleros. Los catalanes superaron al Porto por 4-5.

El restu de participantes foron los arxentinos Concepción y Club Leonardo Murialdo de Mendoza.

Na imaxe, les xugadores asturianes mientres la final. Semeya propiedá del Telecable Hockey Club.

 

Contador Estadistiques