El Telecable fai historia con un plenu de títulos al ganar tamién la Lliga

Un equipu de ḥoquei patinos femenín sigue confirmándose como’l meyor del deporte asturianu en toles disciplines. El Telecable, nome por patrociniu del Club Patín Gijón Solimar, completó una temporada d’escándalu al ganar el títulu de Lliga na final al Generali Palau de Plegamans y facer asina un plenu inéditu: victoria nes cuatro competiciones.

Primero foi la Supercopa, nel arranque de la temporada. Llueu, n’abril, llegó WSE Champions League, y el mes pasáu la Copa, nuna final tamién contra l’equipu catalán, al que superó’l vienres nel segundu partíu de la eliminatoria decisiva de la OK Lliga Iberdrola.

Llegaben les de Ramón Peralta, téunicu uvieín que vive la so primer temporada nel Telecable depués d’una amplia trayeutoria en Catalunya, a esti choque depués de ganar la selmana anterior nun Mata-Xove hasta la bandera por 2-1. Teníen entós dos oportunidaes en Palau-solità i Plegamans pa llevantar la copa, pero nun quixeron llegar a un tercet partíu y al descansu yá llegaben con un 0-2 gracies a un gol tempraneru de Piquero y otru cerca del final de Roces, marcador que les llocales nun podríen igualar na segunda metá magar un gol de Blackman nel minutu 37 que-yos daba esperences (1-2).

D’esta forma’l Solimar consigue la so cuarta lliga y el so decimosestu títulu al acumular tamién 6 copes d’Europa, 5 copes y 1 Supercopa. Amás, conviértese nel primer club en ganar les cuatro competiciones nuna mesma temporada.

Folixa y percorríu en bus per Xixón

La fiesta en La Calzada y en tola villa nun se fixo esperar, depués d’un llargu viaxe dende Catalunya que nun quitó les ganes de celebrar a xugadores, cuerpu téunicu, direutiva y aficionaos desplazaos. Ayeri percorrieron nun autocar de dos pisos descapotable dellos barrios recibiendo’l ciñu de los xixoneses, con fiesta final na Plaza Mayor.

Na imaxe, xugadores y téunicu celebren la victoria cola Copa señalando un cuatro cola mano. Semeya obra de David Valiente pa la Real Federación Española de Patinaxe (RFEP).