El Telecable consigue en Reus la so cuarta Copa

|
Telecable Xixón y Barça Lassa campeones de Copa

Les xixoneses dominaron la fase final y vencieron nel partíu decisivu énte'l Cerdanyola por un contundente 7-3.

Depués del subcampeonatu na primer Intercontinental femenina de ḥoquei sobre patinos, disputada n'avientu n'Arxentina, y de quedar elimináu de la Copa d'Europa, la competición fetiche del Telecable Xixón, el barriu de La Calzada por fin llevó una merecida allegría esta temporada de la mano de les sos moces más internacionales. Les de Fernando Sierra convirtieron la fase final de la Copa nun paséu militar y traxeron a Asturies el cuartu títulu coperu tres superar al Bigues i Riells (5-2) en cuartos, al Vila-sana (6-0) en semifinales y al Cerdanyola na final.

Sicasí, el choque col conxuntu catalán nun foi cenciellu pa les asturianes, que se vieron perbaxo nel marcador con un 1-2. Tardaríen cinco minutos n'empatar por mediación de María Sanjurjo, pa depués enganchar dos tantos práuticamente de siguío Sara Roces pa poner un 4-2  enantes del descansu.

El resultáu darréu s'ampliaría hasta un 6-2 que dexaba práuticamente la final sentenciada. Con esti títulu, el Telecable Solimar yá suma 4 copes, les del 2012, 2013, 2016 y 2019, amás de 5 d'Europa y 3 lligues, consolidándose como'l club col meyor palmarés del país.

Otra manera, la ḷḷeniza Marta González Piquero, autora del gol qu'abrió'l partíu col Cerdanyola y del 6-2, foi nomada meyor xugadora de la fase final de la Copa.

El Barça Lassa, campeón masculín

Como novedá esti añu, les fases finales de les copes femenines y masculines disputáronse al empar y nuna mesma sede. En categoría masculina el ganador foi'l Barça Lassa, que superó na final al Deportivo Liceo gallegu por 4-1.

Semeya propiedá de la RFEP.

 

 

Contador Estadistiques